កីឡាករ សុខ លឹមហេង បាននិយាយថា សមត្ថភាពខ្លួន និង ឈាវ បូរ៉ា គឺមានកម្រិតលេងអុកប្រដំត្រសងគ្នាទេ ប៉ុន្តែដោយសារ បូរ៉ា ដើរអុកភ្លាត់ស្នៀត ទើបខ្លួនឆក់ឱកាសវាយសម្រុកយកឈ្នះតែម្ដង ។ «កីឡាករទាំងអស់មានសក្ដានុពលរៀងៗខ្លួន ហើយយើងប្រឹងបញ្ចេញសមត្ថភាពដូចគ្នា ក៏ប៉ុន្តែវាមានភ្លាត់។ អ៊ីចឹងដូចជាខ្ញុំផ្ទាល់ ខ្ញុំនិងបងបូរ៉ា ជាកីឡាករ(សមត្ថភាព) ប្រដំត្រសងគ្នាទេ ប៉ុន្តែនៅពេលគាត់ភ្លាត់នៅជំហានណាមួយ ទើបធ្វើឱ្យខ្ញុំមានឱកាសផ្ដួលគាត់បាន»។ សុខ លឹមហេង ថ្លែងប្រាប់សារព័ត៌មានថ្មីៗ បែបនេះ។ 
 

កីឡាករ ឈាវ បូរ៉ា ក៏មើលឃើញចំណុចខ្លាំងរបស់ សុខ លឹមហេង គឺពូកែចាប់យកឱកាសនៅពេល ដែលខ្លួនភ្លាត់ស្នៀតបន្តិច នៅក្នុងការប្រកួតដណ្ដើមតំណែងស្ដេចអុកចត្រង្គ នេះ។ ថ្លែងប្រាប់សារព័ត៌មានថ្មីៗ អតីតស្ដេចអុកពីរឆ្នាំជាប់គ្នារូបនេះ បាននិយាយថា៖«គាត់(សុខ លឹមហេង) មានភាពខ្លាំងក្នុងការចល័តកូនអុកដើរលើក្ដារច្រើន ហើយនៅពេលដែលខ្ញុំធ្វេសប្រហែស គាត់អាចគ្រប់គ្រងឱកាសគាត់បាន ធ្វើឱ្យគាត់ទទួលបានជ័យជម្នះ។ ហើយគាត់ពិតជាសាកសមទទួលបានងារជាស្ដេចអុកនេះហើយ»។
 

នេះជាលើកទី២ហើយ ដែល ឈាវ បូរ៉ា បានចាញ់ សុខ លឹមហេង នៅវគ្គផ្ដាច់ព្រ័ត្រដណ្ដើមតំណែងស្ដេចអុកចត្រង្គ។ កាលពីឆ្នាំ២០១៨ នៃព្រឹត្តិការណ៍ស្ដេចអុកអង្គរសង្ក្រាន្តនេះ ឈាវ បូរ៉ា ក៏ចាញ់ សុខ លឹមហេង ដែរ។ តែយ៉ាងណា ឈាវ បូរ៉ា មិនអាក់អន់ចិត្តទេ ព្រោះការប្រកួតតែងតែមានចាញ់-ឈ្នះ។ ជាពិសេសការប្រកួតក្បួនអុកនេះ ក្រៅពីប្រើយុទ្ធសាស្រ្តហើយ វាក៏ពឹងផ្អែកលើឱកាសផងដែរ។