ការប្រកួតពានរង្វាន់ខេមបូឌានលីគខាប់ឆ្នាំ២០២៣ បានរកឃើញ៤ក្រុម ទៅកាន់វគ្គពាក់កណ្តលផ្តាច់ព្រ័ត្រហើយ ក្នុងនោះក៏មានវត្តមានក្រុមការពារតំណែងជើងឯកភ្នំពេញក្រោន និងក្រុមរងជើងឯកវិសាខាផងដែរ។
 

វគ្គបួនក្រុមចុងក្រោយសម្រាប់ជំនួបជើងទី១ ក្រុមកំពូលតារាងពូលA វិសាខា នឹងធ្វើដំណើរទៅកាន់កីឡដ្ឋានខេត្តកំពង់ស្ពឺ ដើម្បីជួបប្រកួតជាមួយក្រុមម្ចាស់ផ្ទះណាហ្គាវើលដ៍ ដែលជាក្រុមលេខ២ មកពីពូលB។  គីរីវង់សុខសែនជ័យដែលបញ្ចប់ក្នុងចំណាត់ថ្នាក់ទី២ពូល A ត្រូវបើកកីឡដ្ឋានគីរីវង់ ទទួលភ្ញៀវនិងជាម្ចាស់ការពារជើងឯកភ្នំពេញក្រោនដែលឈរលេខ១ពូល B។ ការប្រកួតនឹងធ្វើឡើងនៅថ្ងៃទី២២-២៣ខែមេសា។

 

សម្រាប់ការប្រកួតជើងទី២ ក្រុមបាល់ទាត់វិសាខា នឹងបើកទ្វារកីឡដ្ឋានព្រីនស៍ក្នុងទឹកដីរបស់ខ្លួនទទួលភ្ញៀវណាហ្គាវើលដ៍វិញម្តង ហើយក្រុមភ្ញៀវគីរីវង់សុខសែនជ័យ ក៏នឹងត្រូវធ្វើដំណើរទៅកាន់កីឡដ្ឋានស្មាត អ អេស អិន(Smart RSN) ដើម្បីសួរសុខទុក្ខក្រុមម្ចាស់ផ្ទះភ្នំពេញក្រោនផងដែរ ដោយការប្រកួតនឹងធ្វើឡើងនៅថ្ងៃទី២៧-២៨ ខែមេសា។

 

សូមបញ្ជាក់ថា ក្រុមដែលបាត់បង់ឱកាសត្រឹមវគ្គចែកពូល រួមមាន ព្រះខ័នរាជស្វាយរៀង អាយ.អេស.អាយ ដង្កោសែនជ័យ នគរបាលជាតិ សូទីឡូអង្គរ និងអង្គរថាយហ្គឺរមកពីពូលB និងពូលA រួមមាន សមាគមបាល់ទាត់កងយោធពលខេមភូមិន្ទ(ទ័ព) ព្រៃវែង អេហ្វស៊ី បឹងកេត អេហ្វស៊ី អគ្គិសនីកម្ពុជា និងខេត្តកោះកុង៕