អន្តរជាតិ
ប្រធានាធិបតីម៉ិកស៊ិកសន្យារឹតបន្តឹងព័ត៌មានយោធា ក្រោយធ្លាយព័ត៌មានមន្ទីរបញ្ចកោណលួចស៊ើបការណ៍
× ក្រោយមានការលេចធ្លាយពីការលួចស៊ើបការលើសមភាគីនានារបស់អាមេរិក ប្រធានាធិបតីម៉ិកស៊ិក Andres Manuel Lopez Obrador ក៏ចោទក្រសួងការពារជាតិអាមេរិកថា បានស៊ើបការណ៍ជាសម្ងាត់លើរដ្ឋាភិបាលរបស់លោកផងដែរ។ លោក Obrador នឹងចាប់ផ្តើមចាត់ថ្នាក់ព័ត៌មានពីកងកម្លាំងប្រដាប់អាវុធដើម្បីការពារសន្តិសុខជាតិ។
«ឥឡូវនេះយើងនឹងការពារព័ត៌មានពីកងទ័ពជើងទឹក និងក្រសួងការពារជាតិពីព្រោះយើងកំពុងក្លាយជាគោលដៅនៃចារកម្មដោយមន្ទីរបញ្ចកោណ»។ លោក Lopez Obrador បានប្រាប់សន្និសីទសារព័ត៌មានប្រចាំថ្ងៃទី១៨ ខែមេសា។
ការអត្ថាធិប្បាយរបស់លោកបានកើតឡើងប៉ុន្មានថ្ងៃបន្ទាប់ពីកាសែត Washington Post រាយការណ៍អំពីភាពតានតឹងជាក់ស្តែងរវាងកងទ័ពជើងទឹករបស់ម៉ិកស៊ិក និងកងទ័ពអាមេរិក។ ប៉ុន្តែកាសែត Washington Post មិនបានបង្ហាញពីឯកសារដែលបានដកស្រង់ចេញពីការលួចស្ដាប់ការជជែករឿងផ្ទៃក្នុងរបស់មន្ត្រីម៉ិកស៊ិកនោះទេ។
ទាក់ទងរឿងនេះដែរ អ្នកនាំពាក្យមន្ទីរបញ្ចកោណបាននិយាយថា ក្រសួងការពារជាតិអាមេរិកមានភាពជាដៃគូការពារដ៏រឹងមាំជាមួយយោធា និងកងទ័ពជើងទឹករបស់ម៉ិកស៊ិក ក៏ដូចជាអង្គភាពនានាក្នុងការ ដោះស្រាយបញ្ហាប្រឈមរួមគ្នាខណៈពេលដែលគោរពអធិបតេយ្យភាពរបស់គ្នាទៅវិញទៅមកនិងរបៀបវារៈគោលនយោបាយការបរទេសរៀងៗខ្លួន។
កាលពីថ្ងៃទី១៧ ខែមីនា លោក Lopez Obrador បានពណ៌នាការបែកធ្លាយការស៊ើបការណ៍សម្ងាត់ជាការឈ្លានពានដ៏អាក្រក់មួយដែលមិនគួរត្រូវបានទទួលយកក្នុងកាលៈទេសៈណាក៏ដោយ។ ប៉ុន្តែលោកមិនមានគម្រោងប្រឆាំងនឹងអាមេរិកដាច់ណាត់នោះដែរ៕
© រក្សាសិទ្ធិដោយ thmeythmey.com