កីឡាជាតិ
ជាតិ
ស៊ីហ្គេម២០២៣
ភ្លើងគប់ស៊ីហ្គេម ទៅដល់ឡាវ ជាប្រទេសចុងក្រោយ នឹងត្រៀមពិធីហែថ្ងៃទី២៥មេសា លោក ហោ សារុន (ឆ្វេង) ទទួលបាច់ផ្កាពីលោក Sengphone Phonamath(ស្តាំ)។ រូបពី CAMSOC
× ព្រះអគ្គិជ័យកីឡា និង ភ្លើងគប់ស៊ីហ្គេម-អាស៊ានប៉ារ៉ាហ្គេម ឆ្នាំ២០២៣ បានទៅដល់ទីក្រុងវៀងចន្ទន៍ ប្រទេសឡាវ និងត្រៀមដង្ហែនៅថ្ងៃទី២៥ ខែមេសា ឆ្នាំ២០២៣។ ឡាវជាប្រទេសចុងក្រោយ ដែលទទួលគប់ភ្លើងកីឡាចំណោមប្រទេសអាស៊ីអាគ្នេយ៍ មុនធ្វើមាតុភូមិនិវត្តន៍មកកាន់ប្រទេសកម្ពុជាវិញ តាមច្រកព្រំដែនខេត្តស្ទឹងត្រែង។
ទីក្រុងវៀងចន្ទន៍ គឺជាក្រុងចុងក្រោយគេបង្អស់ ក្នុងចំណោមប្រទេសទាំង ១០ ដែលភ្លើងគប់ស៊ីហ្គេមបានបណ្តែតខ្លួនអស់រយៈពេល១ខែ គិតចាប់តាំងពីថ្ងៃ២១ ខែមីនា រហូតដល់ថ្ងៃទី២៧ ខែមេសា ឆ្នាំ២០២៣។
ដំណើរគោចរដឹកនាំដោយប្រធានប្រតិភូនាយបេសកម្ម លោក ហោ សារុន ជានាយបេសកជនពិសេស CAMSOC ទទួលបានការស្វាគមន៍ពី លោកស្រី ថោង សុគន្ធារី ឯកអគ្គរាជទូតកម្ពុជាប្រចាំប្រទេសឡាវ និងលោក Sengphone Phonamath អនុប្រធាន និងជាអគ្គលេខាធិការគណៈកម្មាធិការជាតិអូឡាំពិកឡាវ។
ពិធីដង្ហែភ្លើងគប់ស៊ីហ្គេមនឹងប្រព្រឹត្តទៅនៅថ្ងៃទី២៥ ខែមេសា ក្នុងទីក្រុងវៀងចន្ទន៍ មុនវិលមកប្រទេសកម្ពុជាវិញនៅថ្ងៃទី២៧ ខែមេសា ឆ្នាំ២០២៣ តាមច្រកទ្វារព្រំដែនអន្ដរជាតិត្រពាំងគ្រៀល-ណងណុកឃៀន ខេត្តស្ទឹងត្រែង។
ក្រៅពីម្ចាស់ផ្ទះកម្ពុជា ប្រទេស៩ មានវៀតណាម ហ្វីលីពីន ឥណ្ឌូណេស៊ី ទីម័រខាងកើត ម៉ាឡេស៊ី សិង្ហបុរី ថៃ មីយ៉ាន់ម៉ា និងឡាវប៉ុណ្ណោះ ដែលទទួលពិធីរត់ភ្លើងគប់ ដោយឡែកព្រុយណេ មិនបានទទួលពិធីរត់នេះទេ ដោយសារហេតុផល មិនអាចរៀបចំពិធីជួបជុំអំឡុងពិធីរ៉ាម៉ាឌន។
ក្រោយត្រឡប់មកដល់កម្ពុជា ភ្លើងគប់ស៊ីហ្គេម-ប៉ារ៉ាហ្គេម នឹងបន្តដង្ហែជុំវិញខេត្តជាប់បឹងទន្លេសាបរួមមាន ខេត្តកណ្តាល កំពង់ឆ្នាំង ពោធិ៍សាត់ បាត់ដំបង សៀមរាប បន្ទាយមានជ័យ កំពង់ធំ និងបន្តទៅកាន់ពហុកីឡដ្ឋានជាតិមរតកតេជោ តែម្តងនៅថ្ងៃទី៥ ខែឧសភា ឆ្នាំ២០២៣ ដើម្បីប្រកាសបើកកម្មវិធីព្រឹត្តិការណ៍កីឡាស៊ីហ្គេមលើកទី៣២ ឆ្នាំ២០២៣៕
Tag:
ភ្លើងគប់ស៊ីហ្គេម
ស៊ីហ្គេម២០២៣
© រក្សាសិទ្ធិដោយ thmeythmey.com