ជាតិ
ពលរដ្ឋសង្កាត់ស្វាយដង្គំ រួមគ្នាជួសជុលផ្លូវលំមួយខ្សែ និងសង់សាលាឆទានមួយខ្នង
×
ដោយ៖ ថោង ប្រណី
ប្រជាពលរដ្ឋដែលរស់នៅក្នុងសង្កាត់ស្វាយដង្គំ ក្រុងសៀមរាប បានរួមមតិនិងរៃអង្គាសថវិកាគ្នា ដើម្បីជួសជុលផ្លូវលំមួយខ្សែប្រវែងប្រមាណ ៣គីឡូម៉ែត្រ គិតចាប់ពីទំនប់៧៨ កាត់តាមវាលស្រែត្រោះ ឆ្លងចូលមកឃ្លាំងកន្សែង រហូតចូលដល់បឹងកន្សែង។ ជាមួយគ្នានេះ អ្នកភូមិ ក៏មូលមតិគ្នា កសាងសាលាឆទានសាមគ្គីមួយខ្នងនៅថ្នល់កន្សែង សម្រាប់បម្រើជាប្រយោជន៍ប្រជាកសិករ និងអ្នកនេសាទនៅតំបន់ជុំវិញនោះផងដែរ។
លោក អ៊ុ ឈុំម៉ៅ ជាចាស់ព្រឹទ្ធាចារ្យមួយរូប ដែលជាអ្នកផ្តួចផ្តើមគំនិត និងបានដឹកនាំការជួលជុលនេះ បានប្រាប់សារព័ត៌មានឌីជីថលថ្មីៗកាលពីថ្ងៃទី២១មេសាថា ផ្លូវមួយខ្សែនេះ ទើបតែធ្វើបានរយៈពេល៥ឆ្នាំប៉ុណ្ណោះ។ មួយឆ្នាំក្រោយមក ពលរដ្ឋក៏ធ្លាប់ជួលជុលវាម្តងដែរដោយប្រើពលកម្មមនុស្សសុទ្ធសាធ ជាមួយនឹងសម្ភារដូចជា ចបកាប់ ប៉ែល បង្គីជាដើម។ បើតាម លោក អ៊ុ ឈុំម៉ៅ គម្រោងជួសជុលផ្លូវនេះបន្តត្រូវខកខានដោយសារតែវិបត្តិកូវីដ-១៩។
ដោយឡែក នៅក្នុងឆ្នាំ២០២៣នេះ ដោយមានការស្រុះស្រួលគ្នាពីប្រជាពលរដ្ឋ ការជួសជុលផ្លូវលំនេះ ក៏បានចាប់ផ្តើមម្តងទៀត ដោយពលរដ្ឋម្នាក់ៗ បរិច្ចាគថវិកាតាមលទ្ធភាព។ គម្រោងជួសជុលផ្លូវនេះ គ្រោងចំណាយថវិកាជាង៥០០ដុល្លារ ដែលជាការចាក់បំពេញចំណុចខូចខាត និងទីតាំងមានជង្ហុក។
លោក អ៊ុ ឈុំម៉ៅ បានបន្តថា មួយឆ្នាំក្រោយមក ក៏មានគម្រោងនឹងជួសជុលម្តងទៀតដែរ តែដោយសារការរីករាលដាលនៃជំងឺកូវីដ១៩ ទើបផ្អាកការជួលជុលវិញ។ ដោយឡែកឆ្នាំនេះ តាមរយៈការស្រុះស្រួលមូលមតិគ្នារបស់បងប្អូនកូនចៅក្នុងស្រុកភូមិ និងលោកអ៊ុផ្ទាល់ បានរៃអង្គាសថវិកាតាមកំលាំងសទ្ធាជ្រះថ្លារៀងៗខ្លួនជាថ្មីម្តងទៀត ដើម្បីទិញដីឥដ្ឋចាក់បំពេញបន្ថែមរាល់ចំណុចណាដែលខូចខាត អស់ចំនួន២៥ឡាន ដោយក្នុងមួយឡានតម្លៃ ៨៨០០០រៀន ឬ ២២$។
ក្រៅពីជួសជុលផ្លូវមួយខ្សែនេះ លោក អ៊ុ ឈុំ ម៉ៅ ក៏បានផ្តួចផ្តើមគំនិតកសាងសាលាឆទានសាមគ្គីមួយខ្នង នៅថ្នល់កន្សែង សម្រាប់បងប្អូនកសិករដែលមកមើលថែស្រែស្រូវរបស់ខ្លួន និងអ្នកឃ្វាលគោក្របី សម្រាកយកកម្លាំង ឬទទួលទានអាហារបាន។ សាលាឆទាននេះ ក៏នឹងក្លាយជាទីស្នាក់ ឬជម្រកសម្រាប់ប្រជានេសាទគេចពីភ្លៀងខ្យល់ នៅខែវស្សាផងដែរ៕
Tag:
ជួសជុលផ្លូវ
សាលាឆទាន
សាមគ្គី
© រក្សាសិទ្ធិដោយ thmeythmey.com