មូលបត្រ​រដ្ឋនេះ ជាឧបករណ៍ហិរញ្ញវត្ថុថ្មីមួយ​ដែលរដ្ឋាភិបាលសម្រេចបោះផ្សាយឡើង ដើម្បីពង្រីក និងជំរុញការប្រើប្រាស់ប្រាក់រៀលក្នុងការប្រមូលធនធានក្នុងស្រុកមកអភិវឌ្ឍសេដ្ឋកិច្ច និងសង្គមជាតិ។ នេះជាការលើកឡើងរបស់​ លោក សុខ ខន ប្រធាននាយកដ្ឋានស្ថិតិ និងវិភាគសេដ្ឋកិច្ច នៃអគ្គនាយកដ្ឋានគោលនយោបាយរបស់ក្រសួងសេដ្ឋកិច្ច និងហិរញ្ញវត្ថុ។ ​

 

 

បើតាមលោក សុខ ខន នៅពេលដែលតម្រូវការទីផ្សារកាន់តែទូលំទូលាយ នោះការបោះផ្សាយសញ្ញាបណ្ណ ដែលជាមូលបត្ររដ្ឋ នឹងកាន់តែរីកចម្រើន​ ដែលនាំឱ្យ​ការចរាចរប្រាក់រៀលកាន់តែមានទំហំធំនៅក្នុងទីផ្សារ។

 

ក្នុងកិច្ចសម្ភាសជាមួយកម្មវិធី«ការឈ្វេងយល់ប្រាក់រៀលជាមួយសារព័ត៌មានថ្មីៗ​»​​ នាថ្ងៃទី១១មេសា ឆ្នាំ២០២៣ លោក សុខ ខន បាននិយាយដូច្នេះ៖​«​ជាទូទៅតម្រូវការវិនិយោគ និងសង្គមជាតិ គឺត្រូវអភិវឌ្ឍឥតឈប់ឈរ។ ការអភិវឌ្ឍពីមួយឆ្នាំទៅមួយឆ្នាំនោះ នឹងធ្វើឱ្យការប្រើប្រាស់ប្រាក់រៀលកើនឡើងទៅតាមហ្នឹង»៕​