លោក សួង សុភ័ណ្ឌ បានប្រាប់សាធារណៈជននៅក្នុងវីដេអូប្រមាណជាង ៣នាទីថា រូបលោក នឹងចូលរួមបម្រើការងារជាមួយគណបក្សប្រជាជនកម្ពុជា ចាប់ពីពេលនេះតទៅ។ លោក សួង សុភ័ណ្ឌ បានលើកឡើងថា កន្លងមករូបគេបានលះបង់ពេលវេលាដើម្បីធ្វើការងារនយោបាយជាច្រើននៅកម្ពុជា ដោយពេលនោះ គឺជាអតីតប្រធានចលនាយុវជនគណបក្សប្រឆាំងធំមួយ នៅកម្ពុជា ជាអតីតបេក្ខជនតំណាងរាស្រ្តនៅខេត្តប៉ៃលិន និងបច្ចុប្បន្នជាប្រធានគណបក្សខ្មែរឈ្នះ។ 
 

តាមរយៈវីដេអូប្រមាណជាង ៣នាទី ប្រធានគណបក្សប្រឆាំងរូបនេះ បានរកឃើញចំណុចខ្វះខាតរបស់ខ្លួន ក្នុងការបំពេញការងារជូនជាតិមាតុភូមិ ទើបសម្រេចចិត្តចូលរួមបម្រើការងារជាមួយរដ្ឋាភិបាលនៅពេលនេះ។ លោក សួង សុភ័ណ្ឌ បានប្រកាសខ្លួនយ៉ាងដូច្នេះ៖«ខ្ញុំសួង សុភ័ណ្ឌ ពេលនេះនិងពេលក្រោយ ខ្ញុំជាមនុស្សរបស់គណបក្សប្រជាជនកម្ពុជា ជាមនុស្សរបស់រដ្ឋាភិបាល ហើយប្ដេជ្ញាធ្វើការងារសព្វបែបយ៉ាងទាំងអស់ដើម្បីប្រជាពលរដ្ឋកម្ពុជា។ ខ្ញុំសង្ឃឹមយ៉ាងមុតមាំ ប្រជាពលរដ្ឋនឹងយល់ពីឧត្តមគតិរបស់ខ្ញុំ ហើយខ្ញុំក៏សូមអរគុណដល់ថ្នាក់ដឹកនាំប្រធានគណបក្សប្រជាជនកម្ពុជា ដែលបានបើកភ្លើងខៀវដល់រូបខ្ញុំ»។
 

ជាមួយគ្នានេះ សម្ដេច ហ៊ុនសែន ក៏បានឆ្លើយតបជាមួយ លោក សួង សុភ័ណ្ឌ តាមប្រព័ន្ធតេឡាក្រាមយ៉ាងដូច្នេះថា ក្នុងនាមប្រធានគណបក្សប្រជាជនកម្ពុជា​ សូមស្វាគមន៍យ៉ាងកក់ក្តៅចំពោះលោក សួង សុភ័ណ្ឌ ដែលពេញចិត្តសុំមករួមជីវភាពនយោបាយជាមួយគណបក្សប្រជាជនកម្ពុជា។

សម្ដេច បានថ្លែងទៀតថា ក្នុងនាមរាជរដ្ឋាភិបាលនឹងស្នើសុំព្រះមហាក្សត្រចេញព្រះរាជក្រិត្យតែងតាំងលោក សួង សុភ័ណ្ឌ ជារដ្ឋលេខាធិការទីស្តីការគណរដ្ឋមន្ត្រី៕