អន្តរជាតិ
ការនាំចេញរបស់កូរ៉េខាងត្បូងធ្លាក់ចុះខ្លាំង៧ខែជាប់គ្នា ស្របពេលការលក់បន្តទៅចិនធ្លាក់ចុះរហ័ស
× ការនាំចេញរបស់កូរ៉េខាងត្បូងបានបន្តធ្លាក់ចុះក្នុង៧ខែជាប់គ្នាបើគិតត្រឹមខែមេសាដែលនេះជាការធ្លាក់ចុះដ៏យូរបំផុតក្នុងរយៈពេល៣ឆ្នាំ។ កត្តាដែលជំរុញឱ្យមានបញ្ហានេះ គឺការធ្លាក់ចុះការលក់បន្តទៅចិន និងសម្ពាធពីការធ្លាក់ចុះតម្រូវការពិភពលោក។
ចិន ជាទីផ្សារដ៏សំខាន់សម្រាប់ទំនិញ ជាពិសេសបន្ទះឈីបកូរ៉េខាងត្បូង។ ទោះមហាអំណាចនេះបានបើកសេដ្ឋកិច្ចឡើងវិញកាលពីខែធ្នូ ឆ្នាំ២០២២ ការនាំចេញរបស់កូរ៉េខាងត្បូងទៅកាន់ចិន នៅតែមានការធ្លាក់ចុះដែលបង្កឱ្យមានផលប៉ះពាល់ដល់សេដ្ឋកិច្ច។
ទិន្នន័យរបស់ក្រសួងពាណិជ្ជកម្មកូរ៉េខាងត្បូងបានបង្ហាញនាថ្ងៃទី១ ខែឧសភាថា ការនាំចេញទៅក្រៅប្រទេសបានធ្លាក់ចុះ១៤,២ភាគរយពីមួយឆ្នាំទៅមួយឆ្នាំមកត្រឹម៤៩,៦២ពាន់លានដុល្លារក្នុងខែមេសា ឆ្នាំ២០២២។ វាជាការធ្លាក់ចុះដ៏អាក្រក់បំផុតក្នុងរយៈពេល៣ឆ្នាំ។
ជាមួយគ្នានេះ ការវិភាគទិន្នន័យបានបង្ហាញថា ការនាំចេញទៅកាន់ចិនបានធ្លាក់ចុះ២៦,៥ភាគរយ ដែលជាការធ្លាក់ចុះ១១ខែជាប់គ្នា ខណៈដែលការនាំចេញទៅកាន់អាមេរិកបានធ្លាក់ចុះ៤,៤ភាគរយ។ ប៉ុន្តែការនាំចេញទៅកាន់សហភាពអឺរ៉ុបបានកើនឡើង៩,៩ភាគរយ ។
បើគិតតាមផលិតផល ការនាំចេញបន្ទះឈីបបានធ្លាក់ចុះ៤១ភាគរយ ឯផលិតផលប្រេងបានធ្លាក់ចុះ ២៧,៣ភាគរយ ប៉ុន្តែការនាំចេញរថយន្តបានកើនឡើង៤០,៣ភាគរយ។
ក្នុងសេចក្តីថ្លែងការណ៍មួយ ក្រសួងពាណិជ្ជកម្ម បញ្ជាក់ថា ការធ្លាក់ចុះនេះគឺដោយសារតែការពន្យារពេលនៃការស្ទុះងើបឡើងវិញរបស់សេដ្ឋកិច្ចពិភពលោក និងភាពទន់ខ្សោយនៅក្នុងឧស្សាហកម្មបន្ទះឈីបខណៈពេលថ្ងៃធ្វើការក៏តិចជាងមុន។
ជាលទ្ធផល កូរ៉េខាងត្បូងបានប្រកាសឱនភាពពាណិជ្ជកម្មចំនួន២,៦២ពាន់លានដុល្លារក្នុងខែមេសា ដែលជាខែទី១៤ ប្រទេសជួបបញ្ហាឱនភាពពាណិជ្ជកម្មជាប់ៗគ្នាបែបនេះ៕
© រក្សាសិទ្ធិដោយ thmeythmey.com