អ្វីដែលសម្តេចនាយករដ្ឋមន្រ្តី កត់សម្គាល់ខ្លាំងក្នុងកិច្ចប្រជុំនោះ គឺការនិយាយគ្នាពីរឿងបោះឆ្នោតនៅកម្ពុជា នៅខែកក្កដា ឆ្នាំ២០២៣ ខាងមុខ។ តាមរយៈសំណេរដែលសរសេរចូលទៅក្នុងតេឡេក្រាមភ្ជាប់ជាមួយវីដេអូអំពីកិច្ចប្រជុំ សម្តេច បានទិតៀនអ្នកដែលស្ថិតក្នុងកិច្ចប្រជុំថា ពួកគេ ចង់បានប្រជាធិបតេយ្យ តែប្រឆាំងជាមួយការបោះឆ្នោត និងត្រៀមប្រកាសប្រឆាំងនឹងលទ្ធផលបោះឆ្នោត។
 

ប្រមុខរដ្ឋាភិបាលកម្ពុជា ផ្តាំពួកគេថា៖«ពួកអ្នកមកលេងស្រុកលំបាកបន្តិចហើយ ព្រោះពួកអ្នកត្រូវបានចាត់ទុកថាជាក្រុមជ្រុលនិយមបំផ្លាញជាតិ»។ មេដឹកនាំកម្ពុជា ឆ្លៀតសួរពួកគេម៉ាត់ថា៖«តើចង់បំផ្លាញកម្ពុជាដល់ណាទៀត?» 
 

សម្តេចនាយករដ្ឋមន្រ្តី សំដៅទៅអ្នកប្រឆាំងទាំងនោះថា ពួកគេ រស់នៅក្រៅប្រទេស និងមានសញ្ជាតិបរទេស ដូច្នេះមិនស្គាល់សេចក្តីត្រូវការប្រជាជននៅក្នុងប្រទេសឡើយ។ បន្ថែមពីនេះ សម្តេច ប្រាប់ទៅពួកគេថា មនុស្សនៅជាមួយពួកគេ ក៏មានមនុស្សរបស់សម្តេចដែរ។ សម្តេច បន្តថា ពួកគេ មិនអាចលាក់បាំងកិច្ចប្រជុំរបស់ពួកគេបានឡើយ៕