ភ្នំពេញ៖ កញ្ញា ពើយ ស្រីអូន មានក្តីស្រមៃទៅសិក្សានៅក្រៅប្រទេសតាំងពីក្មេងមកម្ល៉េះ។ វាគឺជាក្តីស្រមៃ ដែលស្រីអូនមិនដែលបោះបង់នោះឡើយ បើទោះជានាងរស់នៅទីជនបទ ហើយស្ថានភាពគ្រួសារនាងខ្សត់ខ្សោយក៏ដោយ។ ដើម្បីសម្រេចបំណងប្រាថ្នារបស់ខ្លួន ស្រីអូន ដឹងយ៉ាងប្រាកដថា មានតែការប្រឹងប្រែងសិក្សាមួយមុខគត់ ដែលនឹងយឹតយោងវាសនានាង ឱ្យបានហោះទៅសិក្សានៅបរទេស។ ពើយ ស្រីអូន បានសង្វាតរៀនសូត្រស្ទើរឥតសម្រាក ទាំងខេមរភាសា និងភាសាអង់គ្លេស រហូតប្រឡងបានពិន្ទុ IELTS 8.0 និងបានជាប់ជ័យលាភីអាហារូបករណ៍ SHE CAN ។ នាង នឹងត្រូវចេញដំណើរទៅសិក្សានៅសហរដ្ឋអាម៉េរិក នាខែសីហា ឆ្នាំ២០២៣ខាងមុខ ដើម្បីសិក្សាជំនាញជីវវិទ្យាម៉ូលេគុល នៅមហាវិទ្យាល័យ Claremont McKenna ក្នុងរដ្ឋ California។
ស្រីអូន គឺជាបេក្ខភាពជ័យលាភីម្នាក់ នៃអាហារូបករណ៍SHE CAN ក្នុងចំណោមសិស្ស៨នាក់ ដែលនឹងត្រូវចេញដំណើរទៅសិក្សានៅសហរដ្ឋអាម៉េរិក នាខែសីហា ឆ្នាំ២០២៣ខាងមុខនេះ។ យុវតីរូបនេះ នឹងសិក្សាជំនាញ ជីវវិទ្យាម៉ូលេគុល នៅមហាវិទ្យាល័យ Claremont McKenna ក្នុងរដ្ឋCalifornia។
កញ្ញា ពើយ ស្រីអូន និងឪពុកម្តាុយ អំឡុងពេលបញ្ចប់ការសិក្សាវិទ្យាល័យនៅអង្គការJPA។ រូបភាពពី៖ កញ្ញា ពើយ ស្រីអូន
យុវតី ពើយ ស្រីអូន មានក្តីស្រមៃទៅសិក្សានៅក្រៅប្រទេសតាំងពីកុមារភាពម្ល៉េះ បើទោះជានឹងបានដឹងថាវាជាការស្រមើស្រមៃដែលពិបាកនឹងកើតឡើងក៏ដោយ។ ស្រីអូន មិនដែលបោះបង់ចោលមហិច្ឆតាក៏ខ្ពស់របស់ខ្លួនឡើយ។ ផ្ទុយទៅវិញ យុវតី ពើយ ស្រីអូន មានដែលមានឪម្តាយជាអាជីវករលក់បន្លែនៅផ្សារពួក ស្រុកពួក ខេត្តសៀមរាប បានឱហាតសិក្សាមិនហ៊ានប្រហែស ដើម្បីធ្វើឱ្យក្តីសុបិនរបស់ខ្លួនក្លាយជាការពិត។
នៅអំឡុងរង់ចាំការចាកចេញទៅសិក្សានៅសហរដ្ឋអាម៉េរិក យុវតីរូបនេះ កំពុងធ្វើជាជំនួយការគ្រូបង្រៀននៅសាលា Jay Pritzker Academy (JPA) ជាសាលាអង្គការ ដែលនាងរៀនតាំងពីថ្នាក់ទី១ រហូតថ្នាក់ទី១២។ សម្រាប់ ស្រីអូន នាងពិតជាមានសំណាងដែលមានសាលាអង្គការមួយនេះនៅក្បែរផ្ទះ ហើយជាទីបណ្តុះបណ្តាលឱ្យខ្លួនមានចំណេះដឹងទូទៅ និងភាសាអង់គ្លេស និងមានសមត្ថភាពក្រសោបបានអាហារូបករណ៍ទៅសិក្សានៅអាម៉េរិក។
ក្មេងស្រីម្នាក់ ដែលមិនចង់ឃើញម្តាយលំបាក
ទោះសាលាមិនឆ្ងាយពីផ្ទះ តែម្តាយស្រីអូន មិនបណ្តោយឱ្យកូនដើរទៅរៀនម្នាក់ឯងឡើយ ដោយស៊ូឆ្លៀតពេលពីការរកស៊ី ដើម្បីជូនកូនទៅសាលា រហូតដល់កូនអាចជិះកង់ទៅរៀន ខ្លួនឯង។ ម្តាយស្រីអូន ជាអ្នកលក់បន្លែនៅផ្សារពួក ហើយជារឿយៗ ស្រីអូន បានឆ្លៀតពេលទៅជួយលក់ម្តាយ។ ការណ៍នេះបានធ្វើឱ្យ ស្រីអូន ដឹងថាម្តាយរបស់ខ្លួនលំបាកយ៉ាងណា ដែលត្រូវក្រោកទៅលក់បន្លែម៉ោង១ ឬ២យប់ ដើម្បីមានលទ្ធភាពផ្គត់ផ្គង់ការរៀន សូត្ររបស់ខ្លួន និងគ្រួសារ។
«ដោយសារគាត់ងើបទៅម៉ោង ១ឬ២យប់ អ៊ីចឹងគាត់មិនងាយឱ្យពួកខ្ញុំទៅទេ។ លុះត្រាថ្ងៃណាគាត់លំបាកខ្លាំង ទើបគាត់ដាច់ចិត្តឱ្យពួកខ្ញុំទៅជួយ។ ដល់ពេលខ្ញុំទៅ ទើបដឹងថាគាត់ពិបាកប៉ុនណា គាត់ធ្វើការអត់ងងុយ ហើយប្រើកម្លាំងខ្លាំងទៀត។ អ៊ីចឹងហើយបានខ្ញុំខំរៀន ដើម្បីជួយគាត់នៅពេលអនាគត»។ ស្រីអូន បានប្រាប់អ្នកសារព័ត៌មានថ្មីៗតាមទូរសព្ទដូច្នេះ។
នាមជាកូន ពិតជាមិនសប្បាយចិត្តឡើយពេលឃើញម្តាយហត់នឿយយ៉ាងខ្លាំង ដើម្បីកូនៗមានអាហារបរិភោគគ្រប់គ្រាន់ មានសម្លៀកបំពាក់ស្អាតៗ និងទទួលបានការអប់រំល្អ។ ស្រីអូន មានកូនចិត្តមួយថា នឹងខំរៀនដើម្បីជួយគ្រួសារឱ្យមានជីវភាពល្អប្រសើរ ហើយមិន ចង់ឱ្យម្តាយធ្វើការហូរញើស អត់ងងុយបែបនេះទៀតឡើយ។
មានសំណាងសិក្សានៅសាលាអង្គការ JPA ដែលផ្តល់ការសិក្សាឥតគិតថ្លៃ តាមស្តង់ដាអាម៉េរិក ស្រីអូន បានខ្មីឃ្មាតរៀនសូត្ររហូតក្លាយជាសិស្សឆ្នើមម្នាក់។ ដ្បិតចំនួនសិស្សត្រូវបានកំណត់ សាលាតែងប្រឡងជម្រុះសិស្សរៀងរាល់ឆ្នាំ ដោយសិស្សណាមានសមត្ថភាព និងមានលំដាប់ពិន្ទុល្អ ទើបអាចបន្តសិក្សានៅទីនេះបាន។
«សិស្ស ១០០ ឬ២០០នាក់ ដាក់ពាក្យគេយកតែ ៥០ ឬ៦០នាក់ទេ ដោយសារជាសាលាអង្គការ។ យើងរៀននៅសាលាអង្គការ ពេលយើងរៀននៅហ្នឹង គេគិតយើងជាសិស្ស អាហារូបករណ៍។ សិស្សនៅទីនេះ គេយកតែសិស្សឆ្នើម ហើយមានចំណេះដឹងល្អ ហើយគេជម្រុះរៀងរាល់ឆ្នាំ»។ ស្រីអូន បានពន្យល់បានដូច្នេះ អំពីការសិក្សានៅសាលា JPA។
រយៈពេល១២ឆ្នាំ ជាមួយការសិក្សាទាំងភាសាខ្មែរ និងបរទេស រួមទាំងការប្រឡងជម្រុះរាល់ឆ្នាំផង ស្រីអូន បានបញ្ចប់ការសិក្សានៅសាលា JPA ដោយជោគជ័យ និងទទួលបាននិទ្ទេស B លើការប្រឡងសញ្ញាបត្រទុតិយភូមិ ឆ្នាំសិក្សា ២០២១-២០២២។ ជាមួយគ្នានោះ ស្រីអូន ក៏មិនភ្លេចក្តីស្រមៃដែលឱបទុកក្នុងចិត្តឡើយ ដោយបានឆ្លៀតពេលពីការសិក្សា ទៅដាក់ពាក្យប្រឡងអាហារូបករណ៍ SHE CAN។
សមរភូមិអាហារូបករណ៍
ខណៈសិស្សានុសិស្សឯទៀតខំប្រឹងរៀនដើម្បីទទួលបាននិទ្ទេសសញ្ញាបត្រទុតិយភូមិល្អ ស្រីអូន ត្រូវខំប្រឹងទ្វេដង ដ្បិតត្រូវប្រឡងអាហារូបករណ៍មួយទៀត។ ទន្ទឹមនោះ បេក្ខភាពដែលចូលរួមប្រឡង សុទ្ធពូកែទាំងចំណេះដឹងទូទៅ និងភាសាបរទេស ដែលជាកត្តាទាមទារឱ្យកូនអ្នកស្រុកពួករូបនេះ ត្រូវឃ្មាតខ្មីទាំងយប់ទាំងថ្ងៃ។
ស្រីអូន បានរម្លឹកថា៖ « ខ្ញុំនៅស្រុកស្រែ មានផ្ទះឈើ ហើយកាមេរ៉ាខ្ញុំអត់សូវច្បាល់ល្អដូចពួកគាត់ ដូច្នេះពួកគាត់ភ្ញាក់ផ្អើលពេលលឺខ្ញុំនិយាយ ហើយឃើញសមត្ថភាពរបស់ខ្ញុំ។ ពេលជួបគាត់នៅភ្នំពេញ គាត់ថា មិននឹកស្មានថាខ្ញុំមានសមត្ថភាព ខុសជីវភាពរបស់ខ្ញុំ»។
ត្រឹមជាក្មេងស្រីតូចមួយ ដែលស្វះស្វែងកាប់ឆ្ការផ្លូវទៅកាន់គោលដៅ ស្រីអូន ត្រូវឆ្លងកាត់ការប្រឡងជាច្រើនដំណាក់កាល។ ទោះខំប្រឹងច្រើនលើស្រាវជ្រាវតាមអ៊ឺនធឺណិត តែស្រីអូន នៅតែមានចន្លោះប្រហោងក្នុងការឆ្លើយសំណួរមួយចំនួន។ ជាពិសេសការឆ្លើយសំណួរជាភាសាអង់គ្លេសរាប់រយពាក្យ ដែលពាក់ព័ន្ធនឹងការស្គាល់ពីខ្លួនឯង រួមទាំងគោលដៅអនាគត។ វាជាសំណាងធំមួយ ដែលបានរៀនអង់គ្លេសតាំងពីក្មេង ប៉ុន្តែការលំបាក គឺស្រីអូន មិនសូវបានស្វែងយល់ និងស្គាល់ខ្លួនឯងមិនច្បាស់។
យុវជនវ័យ១៨ឆ្នាំរូបនេះ បានលើកឡើងដូច្នេះ៖«វាពិបាក គេឱ្យនិយាយពីខ្លួនឯង តែអត់ដឹងត្រូវចាប់ផ្តើមពីត្រង់ណា។ យើងអត់ភ័យទេ តែគេឱ្យយើងនិយាយ ២០០ ទៅ៣០០ពាក្យ ហើយអត់ដឹងថាត្រូវគួរដាក់ពាក្យសំខាន់ណា ដោយសារអត់សូវមានអ្នក ដែលយើងអាចសិក្សាបាន អ៊ីចឹងរៀងលំបាកច្រើន ហើយ៥សំណួរ ត្រូវសរសេរជាសំណេរច្រើន»។
ទោះជាមានឧបសគ្គបន្តិចក្តី តែកូនអ្នកស្រុកពួករូបនេះ នៅតែអាចជម្នះបានជាមួយលទ្ធផលដ៏សែនរំភើប និងនឹកស្មានមិនដល់សម្រាប់គ្រួសារទាំងមូល។ កញ្ញា ពើយ ស្រីអូន ត្រូវបានជ្រើសរើសជាបេក្ខភាពជ័យលាភីអារូបករណ៍ម្នាក់ ក្នុងចំណោមសិស្ស៨នាក់។ ស្រីអូន សឹងមិនជឿថាអាចធ្វើបាន ដ្បិតខ្លួនជាសិស្សនៅតំបន់ដាច់ស្រយាល ជីវភាពលំបាក ហើយសម្លឹងមើលទៅបេក្ខភាពឯទៀតសុទ្ធមានសមត្ថភាពខ្លាំងៗ និងជីវភាពធូរធារ។
កញ្ញាមានមោទកភាពចំពោះខ្លួនឯងជាខ្លាំង ដែលអាចដើរដល់ចំណុចនេះ និងរីករាយបំផុតនៅពេលឃើញស្នាមញញឹមរបស់ម្តាយ ចំពោះលទ្ធផលនេះ។ ពិតណាស់ ភាពជោគជ័យរបស់កូន គឺជាក្តីសុខរបស់ម្តាយឪពុកគ្រប់រូប។ ការលះបង់មិនអសារបង់ ព្រោះកូនៗបានដល់ទីល្អប្រសើរមួយ និងមានភាពថ្កុំថ្កើង។
«គាត់ថា គាត់ជឿជាក់លើខ្ញុំ។ គាត់ថា គាត់ហត់ខ្លាំងដែររាល់ថ្ងៃ ប៉ុន្តែពេលឃើញកូនខិតខំបានជាប់ គាត់ថាជាការតបស្នងមួយហើយ គាត់អត់ហត់ទៀតទេ។ តាំងពីដើមមក គាត់មិនដែលនឹកស្មានថាមានថ្ងៃនេះទេ»។ ស្រីអូន និយាយទាំងអួលដើមក ដោយសារសេចក្តីរំភើប ពេលរម្លឹកពីពាក្យសម្តីអ្នកម្តាយ។
ស្រីអូន ជឿជាក់ថា ចំណេះដឹងពិតជាអាចនាំមនុស្សហោះហើរទៅកាន់ក្តីស្រមៃ ព្រោះបើគ្មានចំណេះដឹង កញ្ញាក៏មិនអាចមានឱកាសទៅសិក្សានៅក្រៅប្រទេស និងទទួលបានបទពិសោធន៍ថ្មីឡើយ។ ចំណេះវិជ្ជា ប្រៀបបាននឹងស្លាបដ៏រឹងមាំសម្រាប់កញ្ញា ពើយ ស្រីអូន ដើម្បីឆ្ពោះទៅកាន់កន្លែងដែលប៉ងប្រាថ្នា។ កូនស្រីទី២រូបនេះ អរគុណចំពោះឪពុកម្តាយយ៉ាងខ្លាំង ដែលយល់ពីតម្លៃនៃចំណេះដឹង និងផ្តល់ឱកាសឱ្យខ្លួនបានសិក្សាសាលាល្អ។
«សម្រាប់ខ្ញុំ ចំណេះដឹងពិតជាមានតម្លៃ ហើយខ្ញុំមកដល់ចំណុចនេះក៏ដោយសារចំណេះដឹងដែរ។ ចំណេះបានយកខ្ញុំទៅឆ្ងាយ បានទៅប្រទេសផ្សេងៗបានបទពិសោធន៍ និងទទួលបានចំណេះដឹងកាន់ច្រើន។ ទាំងនេះហើយ ដែលវាជាស្ពានជួយឱ្យខ្ញុំទទួលបានអាហារូបករណ៍»។
ស្រីអូន នឹងបន្តការសិក្សានៅ Claremont McKenna ដែលស្ថិតក្នុងរដ្ឋ California សហរដ្ឋអាម៉េរិក។ ព្រោះមានចំណូលចិត្តច្រើនទៅលើផ្នែកវិជ្ជសាស្រ្ត និងការស្រាវជ្រាវ យុវតីរូបនេះ នឹងចាប់យកជំនាញ ជីវៈវិទ្យា ម៉ូលេគុល។ ទោះជំនាញនេះ ហាក់មានទីផ្សារចង្អៀតនៅកម្ពុជា ប៉ុន្តែស្រីអូន ប្តេជ្ញាក្រេបយកចំណេះដឹងពីក្រៅប្រទេសមកជួយដល់ប្រទេសកំណើត។
«ប្រសិនបើខ្ញុំរៀនខាងនេះ ខ្ញុំអាចស្រាវជ្រាវគ្រប់យ៉ាងតាំងពីថ្នាំ បច្ចេកវិទ្យាក្នុងការជួយព្យាបាលជំងឺ ដូចជាមហារីក ឬក៏ជំងឺផ្សេងៗ។ ណាមួយខ្ញុំឃើញថា ប្រទេសកម្ពុជានៅមានកម្រិតនៅឡើយខាងផ្នែកនេះ អ៊ីចឹងខ្ញុំចង់ជំរុញឱ្យវិទ្យាសាស្រ្ត នៃការស្រាវជ្រាវនៅកម្ពុជាឱ្យកាន់តែទៅមុខ។ ខ្ញុំប្តេជ្ញាចិត្តថាចង់មកវិញ ចង់មកជួយអ្នកដែលគាត់មិនបានទទួលឱកាសទាំងនេះ ហើយខ្ញុំមិនឈប់ត្រឹមហ្នឹងទេ ខ្ញុំនឹងខិតខំដើម្បីខ្លួនឯង និងគ្រួសារឱ្យកាន់តែប្រសើរជាងណឹង»។ កញ្ញា ពើយ ស្រីអូន និស្សិតអាហារូបករណ៍ SHE CAN បានលើកឡើងដូច្នេះពីការចាប់យកជំនាញរៀននៅមហាវិទ្យា៕