អន្តរជាតិ
រូបភាពពីផ្កាយរណបនៃកាំភ្លើងធំរុស្ស៊ីដែលបានដាក់ពង្រាយបន្ថែមតាមបណ្តោយឆ្នេរនៅភូមិ Vitino ក្នុងតំបន់ Crimea កាលពីថ្ងៃទី៣១ ខែមីនា ឆ្នាំ២០២៣។ (2023 Maxar Technologies/Handout via REUTERS)
×![]()
ដោយ: VOA
ក្រសួងការពារជាតិចក្រភពអង់គ្លេសបានបញ្ជាក់នៅថ្ងៃចន្ទនេះនៅក្នុងរបាយការណ៍ព័ត៌មានស៊ើបការណ៍សម្ងាត់ប្រចាំថ្ងៃរបស់ខ្លួនអំពីការឈ្លានពានរបស់រុស្ស៊ីលើអ៊ុយក្រែនថា៖ «រុស្ស៊ីបានកសាងប្រព័ន្ធកិច្ចការពារយោធាដ៏ទូលំទូលាយបំផុតមួយចំនួនដែលគេមិនដែលឃើញនៅលើពិភពលោកអស់រយៈពេលជាច្រើនទសវត្សរ៍កន្លងមកនេះ»។
របាយការណ៍ដែលបង្ហោះនៅលើ Twitter នេះបានលើកឡើងថា មានរូបភាពដែលបង្ហាញថា រុស្ស៊ី «បានធ្វើកិច្ចប្រឹងប្រែងពិសេស» ដើម្បីពង្រឹងព្រំដែនភាគខាងជើងនៃតំបន់ Crimea «ដែលក្នុងនោះរួមមានទាំងតំបន់ការពារច្រើនជាន់នៅជិតភូមិ Medvedevka ផងដែរ»។
បន្ថែមពីលើនេះទៀត បើយោងតាមក្រសួងការពារជាតិអង់គ្លេសនេះ រុស្ស៊ីបានជីក«លេណដ្ឋានរាប់រយគីឡូម៉ែត្រនៅខាងក្នុងដែនដីរុស្ស៊ីដែលទទួលស្គាល់ជាអន្តរជាតិ ដែលក្នុងនោះរួមមានទាំងនៅក្នុងតំបន់ Belgorod និងតំបន់ Kursk ផងដែរ»។
របាយការណ៍នេះបានលើកឡើងទៀតថា លេណដ្ឋានទាំងនេះបង្ហាញឱ្យឃើញថា រុស្ស៊ីបារម្ភថាអ៊ុយក្រែនអាចសម្រេចបាននូវ«ការវាយសម្រុកចូលបានដ៏សំខាន់មួយ»។ ប៉ុន្តែ ក្រសួងការពារជាតិអង់គ្លេសបានបញ្ជាក់ថា កិច្ចការមួយចំនួន«ទំនងជាត្រូវបានបញ្ជាដោយមេបញ្ជាការមូលដ្ឋាននិងមេដឹកនាំស៊ីវិលក្នុងគោលបំណងដើម្បីគាំទ្រការលើកឡើងផ្លូវការរបស់ខ្លួនដែលថារុស្ស៊ីរង«ការគំរាម» ពីអ៊ុយក្រែននិងអង្គការអូតង់ (NATO)»។
ថ្ងៃអាទិត្យម្សិលមិញ គឺជាទិវាវិជ្ជាជីវៈរបស់ឆ្មាំល្បាតព្រំដែននៅអ៊ុយក្រែន។ នេះបើតាមការបញ្ជាក់របស់ប្រធានាធិបតីអ៊ុយក្រែនលោក Volodymyr Zelenskyy នៅក្នុងសុន្ទរកថាប្រចាំថ្ងៃរបស់លោកកាលពីថ្ងៃអាទិត្យ។ លោកថ្លែងដូច្នេះថា៖ «ឆ្មាំល្បាតព្រំដែន គឺជាអ្នកដែលប្រឈមដំបូងគេបង្អស់ជាមួយនឹងពួកឈ្លានពាននៅភាគខាងកើត។ ពួកគេការពារព្រំដែនបានយ៉ាងតឹងរ៉ឹង»។
ការវាយប្រហាររបស់រុស្ស៊ីនៅទូទាំងប្រទេសអ៊ុយក្រែនបានសម្លាប់កុមារយ៉ាងតិច ៤៧៧ នាក់និងធ្វើឱ្យកុមារជិត ១.០០០ នាក់ទៀតរងរបួស តាំងពីពេលដែលរុស្ស៊ីបានឈ្លានពានអ៊ុយក្រែនកាលពីជាងមួយឆ្នាំមុនមក។ នេះបើតាមការបញ្ជាក់របស់ការិយាល័យអគ្គរដ្ឋអាជ្ញាអ៊ុយក្រែនកាលពីថ្ងៃអាទិត្យនៅក្នុងរបាយការណ៍មួយដែលបង្ហោះនៅលើ Telegram។
ការស្លាប់និងរបួសភាគច្រើនត្រូវបានកត់ត្រាថាបានកើតឡើងនៅក្នុងតំបន់ Donetsk និងតំបន់ Kharkiv ដោយនៅតំបន់ Donetsk កុមារ ៤៥២ នាក់ត្រូវបានសម្លាប់ ឬក៏រងរបួស ហើយនៅតំបន់ Kharkiv កុមារ ២៧៥ នាក់ត្រូវបានសម្លាប់ ឬក៏រងរបួស៕
© រក្សាសិទ្ធិដោយ thmeythmey.com
«ស្មើរនេះ», «ថ្មើរនេះ» និង«ថ្មារនេះ» មួយណាត្រូវ?
ភ្នំពេញ 1 ថ្ងៃ
