លោក Mohammed Herman Zailani គ្រូជម្រើសជាតិឡាវ បាននិយាយថា កម្ពុជានឹងមានសម្ពាធ និងប្រឈមមុខជាមួយអ្នកគាំទ្រដ៏ច្រើន ប្រសិនជាមិនអាចយកឈ្នះឡាវ នាការប្រកួតបើកឆាកដំបូងនេះ។
 

ថ្លែងក្នុងសន្និសីទមុនការប្រកួត នាថ្ងៃទី២ ឧសភា គ្រូបង្វឹកឡាវរូបនេះ បាននិយាយថា៖«ការប្រកួតថ្ងៃស្អែកនេះ វាអាចជាសម្ពាធសម្រាប់កម្ពុជា ក៏ថាបាន ព្រោះមានអ្នកគាំទ្រជាច្រើនរង់ចាំមើលពួកគេ។ ហើយបើសិនជាការកម្ពុជា ធ្វើមិនបានល្អទេ វាបង្ហាញថា ការត្រៀមខ្លួនរបស់ពួកគេ៦ខែមកនេះ មិនទាន់ល្អទេ»។
 

គ្រូជម្រើសជាតិនារីឡាវ សញ្ជាតិឥណ្ឌូណេស៊ីរូបនេះ បានអះអាងថា កូនក្រុមខ្លួន បានត្រៀមខ្លួនយ៉ាងល្អបំផុត ក្នុងការយកឈ្នះលើក្រុមជម្រើសជាតិកម្ពុជា។

 

ដោយឡែកគ្រូបង្វឹកកម្ពុជា បានបញ្ជាក់ថា កូនក្រុមខ្លួន នឹងធ្វើឱ្យបានល្អសម្រាប់ការប្រកួតជាមួយឡាវនេះ។ គ្រូបង្វឹកកម្ពុជា សញ្ជាតិចិន ដែលបានមកដឹកនាំក្រុមនារី៤ខែមកនេះ បានអះអាងថា ការត្រៀមខ្លួនរបស់កម្ពុជា នៅចិន៦ខែ នឹងសម្រេចបានលទ្ធផលល្អ។
 

សម្រាប់ការប្រកួតរវាងក្រុមបាល់ទាត់នារីកម្ពុជា និងឡាវ នឹងប្រព្រឹត្តិទៅនៅម៉ោង៨យប់ នៅកីឡដ្ឋានស្មាត RSN នាថ្ងៃទី៣ ឧសភា៕