តាមអ្នកនាំពាក្យក្រសួងការបរទេសឥណ្ឌូណេស៊ី លោក​ Teuku Faizasyah ហេតុការណ៍បាញ់ប្រហារលើមន្ត្រីអាស៊ាន បានកើតឡើងនៅទីប្រជុំជន Hsi Hseng ក្នុងរដ្ឋភាគខាងលិច Shan  ហើយការធ្វើដំណើរតាមឡាននោះ មានទាំងមន្ត្រីមជ្ឈមណ្ឌលជំនួយមនុស្សធម៌អាស៊ាន។ អ្នកនៅពីក្រោយចំពោះសកម្មភាពនេះ មិនទាន់ត្រូវបានបញ្ជាក់ច្បាស់នោះឡើយ។

 

មន្ត្រីអ្នកនាំពាក្យក្រសួងការបរទេសសិង្ហបុរីបាននិយាយថា បុគ្គលិកពីរនាក់នៃស្ថានទូតសិង្ហ បុរីក្នុងទីក្រុងយាំងហ្គោនដែលជាផ្នែកនៃក្បួនរថយន្តមានសុវត្ថិភាពធម្មតា ហើយបានត្រឡប់ទៅទីក្រុងវិញហើយ។ 

 

«មានតែការសន្ទនាបែបស្ថាបនាក្នុងចំណោមភាគីពាក់ព័ន្ធសំខាន់ៗទាំងអស់នៅមីយ៉ាន់ម៉ា ប៉ុណ្ណោះ ដែលអាចសម្រួលដល់ដំណោះស្រាយដោយសន្តិវិធីដើម្បីផលប្រយោជន៍របស់ប្រជាជនមីយ៉ាន់ម៉ា»។ ក្រសួងការបរទេសសិង្ហបុរីបានលើកឡើងបែបនេះ ក្នុងសេចក្ដីថ្លែងការណ៍មួយចេញនៅថ្ងៃទី៨ ខែឧសភា។ 

 

ប្រធានាធិបតីឥណ្ឌូណាស៊ី លោក ចូកូ វីដូដូ មិនបានផ្តល់ព័ត៌មានលម្អិតអំពីអ្វីដែលលោក ហៅថា ការបាញ់ប្រហារនោះទេ ប៉ុន្តែបាននិយាយថា វានឹងមិនរារាំងកិច្ចខិតខំរបស់ឥណ្ឌូណេស៊ី និងអាស៊ានក្នុងការជំរុញសន្តិភាពនៅមីយ៉ាន់ម៉ានោះឡើយ។ យ៉ាងណាមិញ លោកនៅតែ ទទូចឱ្យមីយ៉ាន់ម៉ាឈប់ប្រើប្រាស់កម្លាំង និងអំពើហិង្សាពីព្រោះជនរងគ្រោះគឺជាប្រជាពលរដ្ឋតែប៉ុណ្ណោះ ហើយស្ថានភាពនេះនឹងមិនធ្វើឱ្យមានអ្នកចាញ់ ឬឈ្នះនោះទេ។

 

លោកវីដូដូបានបន្តថា ឥណ្ឌូណេស៊ីលើកទឹកចិត្តរាល់ភាគីពាក់ព័ន្ធចូលរួមលើតុសន្ទនា ដើម្បីស្វែង រកដំណោះស្រាយផងដែរ។

 

រដ្ឋាភិបាលរួបរួមជាតិស្រមោលរបស់មីយ៉ាន់ម៉ាដែលជាសម្ព័ន្ធមិត្តជាមួយកងជីវពលប្រឆាំង របបយោធាកងកម្លាំងការពារប្រជាជន (PDF) អះអាងថា ខ្លួនមិនជាប់ពាក់ព័ន្ធក្នុងឧប្បត្តិហេតុនេះទេ ហើយក៏មិនបានអធិប្បាយអ្វីបន្ថែមចំពោះបញ្ហានេះឡើយ។ អ្នក​នាំ​ពាក្យ​​យោធា​មីយ៉ាន់ម៉ា ក៏មិន​បាន​ឆ្លើយ​តបថាយ៉ាងណាដែរ។

គួរបញ្ជាក់ថា រដ្ឋមន្ត្រីការបរទេសឥណ្ឌូណេស៊ីបាននិយាយកាលពីសប្តាហ៍មុនថា បានចូល រួមដោយស្ងាត់ៗជាច្រើនខែជាមួយរបបយោធាមីយ៉ាន់ម៉ា រដ្ឋាភិបាលស្រមោល និងក្រុមជន ជាតិភាគតិចប្រដាប់អាវុធ ដើម្បីព្យាយាមចាប់ផ្តើមដំណើរការសន្តិភាព។ ឥណ្ឌូណេស៊ីដែលជា ប្រធានអាស៊ានឆ្នាំនេះរំពឹងថានឹងអាចដោះស្រាយបញ្ហាចាក់ស្រេះនេះបានមួយកំរិតបន្ថែម ទៀត៕