តាមរយៈកិច្ចសម្ភាសជាមួយសារព័ត៌មានថ្មីៗ សួន ចាន់ណារ៉ូ បានបញ្ជាក់ដូច្នេះថា៖«យុវសម័យ ២០២៣នេះ គេឃើញកម្ពុជា គេនឹងរអាលគេចកម្ពុជា ព្រោះកម្ពុជា មិនដូចកម្ពុជា ពីមុនឱ្យគេវាយ ទាត់(ឈ្នះ) ដោយសេរីដូចមុនទេ នៅក្នុងវិស័យបាល់ទះ»។
 

បើតាម ណារ៉ូ ដែលមានរហស្សនាម «ក្មេងតូច» រូបនេះ ក្រោយកម្ពុជា បានបង្ហាញភាពលេចធ្លោជាបន្តបន្ទាប់ នាការប្រកួតស៊ីហ្គេម ២ឆ្នាំចុងក្រោយនេះ គឺមានក្លិបបរទេសនៅក្នុងតំបន់ បានទាក់ទងកីឡាករកម្ពុជា ទៅលេងនៅក្នុងក្លិបពួកគេ។ 
 

«ខ្ញុំគ្រាន់តែបង្ហើបបន្តិចទេថា ចប់ស៊ីហ្គេម កីឡាករយើងនឹងមានតម្លៃខ្លួនទៅលេងក្រៅប្រទេសដូចជា ថៃ ឥណ្ឌូណេស៊ី ហ្វីលីពីន វៀតណាម និងម៉ាឡេស៊ី »។ នេះជាការបង្ហើបព័ត៌មានពីកីឡាករ សួន ចាន់ណារ៉ូ ដែលបានបន្ថែមថា ក្លិបបាល់ទះនៅប្រទេសថៃ បានទាក់ទងមករូបលោក និងខាងសហព័ន្ធបាល់ទះកម្ពុជា ដើម្បីនាំកីឡាករកម្ពុជាទៅលេងនៅលីគថៃ៕