បើតាមការចុះផ្សាយរបស់បញ្ជាការដ្ឋានកងរាជអាវុធហត្ថរាជធានីភ្នំពេញ ជនសង្ស័យទាំង២នាក់ បានក្លែងបន្លំជាសមត្ថកិច្ច ហើយឃាត់ប្រជាពលរដ្ឋតាមផ្លូវឆែករកគ្រឿងញៀន និងគំរាមកំហែងជំរិតទារប្រាក់ពីពលរដ្ឋ។ លើសពីនេះ ពួកគេ ក៏បានលើកស្លាក «មូលដ្ឋានកងរាជអាវុធហត្ថរាជធានីភ្នំពេញ» នៅផ្ទះរបស់ពួកគេ ដែលស្ថិតនៅក្រុម៧ ភូមិដីថ្មី សង្កាត់គោកឃ្លាង ខណ្ឌសែនសុខ រាជធានីភ្នំពេញផងដែរ​។

 

ជនសង្ស័យម្នាក់ ត្រូវបានកងរាជអាវុធហត្ថភ្នំពេញឃាត់ខ្លួន ឯម្នាក់ទៀត បានរត់គេចខ្លួន។ ក្រោយពេលសាកសួរ ជនស្ស័យ ដែលត្រូវចាប់ខ្លួន បានសារភាពថា រូបគេពិតជាបានក្លែងបន្លំឯកសណ្ឋានកងរាជអាវុធហត្ថ និងយោធា ដើម្បីធ្វើសកម្មភាពឃាត់ប្រជាពលរដ្ឋតាមផ្លូវឆែករកគ្រឿងញៀន និងគំរាមកំហែងជំរិតទារប្រាក់ពិតប្រាកដមែន។ នេះបើតាមកងរាជអាវុធហត្ថរាជធានីភ្នំពេញ។

 

ជនសង្ស័យ ដែលត្រូវចាប់ខ្លួននេះ ត្រូវបានកម្លាំងកងរាជអាវុធហត្ថរាជធានីភ្នំពេញ រៀបចំសំណុំរឿងបញ្ជូនទៅតុលាការដើម្បីអនុវត្តតាមច្បាប់។ ចំណែកជនសង្ស័យម្នាក់ទៀត សមត្ថកិច្ច កំពុងបន្តស្រាវជ្រាវឃាត់ខ្លួនយកមកដាក់ទោសតាមផ្លូវច្បាប់៕