តាមអង្គការអន្តរជាតិសម្រាប់ការធ្វើចំណាកស្រុករបស់ UN មនុស្សជាង ៧០ ម៉ឺននាក់ ឥឡូវនេះត្រូវបានផ្លាស់ទីលំនៅក្នុងស្រុក ក្រោយការប្រយុទ្ធចាប់តាំងពីថ្ងៃទី១៥ ខែមេសាមក។

 

«កាលពីថ្ងៃទី៩ ខែឧសភាសប្ដាហ៍មុនតួលេខមានចំនួន ៣៤ ពាន់នាក់ប៉ុណ្ណោះ»។ អ្នកនាំពាក្យ ទីភ្នាក់ងារ UN លោក Paul Dillon បានលើកឡើងបែបនេះពីទីក្រុងហ្សឺណែវដោយចង់បញ្ជាក់ ពីចំនួនមនុស្សចំណាកស្រុកកាលពីអាទិត្យមុន។

 

ចំនួនប្រជាជនឆ្លងកាត់ព្រំដែនមានការកើនឡើង ដើម្បីគេចចេញពីជម្លោះរវាងកងកម្លាំងដែល ស្មោះត្រង់នឹងអតីតប្រធានក្រុមប្រឹក្សាអធិបតេយ្យភាពបណ្តោះអាសន្នស៊ូដង់លោក Abdel Fattah al-Burhan និងអនុប្រធានក្រុមប្រឹក្សាអធិបតេយ្យភាពបណ្តោះអាសន្នស៊ូដង់លោក Mohamed Hamdan Daglo ដែលបញ្ជាកងកម្លាំងគាំទ្រយោធាប៉ារ៉ា (RSF)។

 

ការប្រយុទ្ធគ្នាបានប្រមូលផ្តុំនៅក្នុងរដ្ឋធានីខាទុំ ប៉ុន្តែតំបន់ផ្សេងទៀត ជាពិសេសតំបន់ Darfur ភាគខាងលិចជាប់ព្រំដែនឆាដ ក៏មានការប្រយុទ្ធគ្នាយ៉ាងធ្ងន់ធ្ងរផងដែរ។ ទីភ្នាក់ងារជនភៀសខ្លួនរបស់ UN បាននិយាយកាលពីថ្ងៃទី៨ ខែឧសភាថា ជនជាតិ ស៊ូដង់ចំនួន ១៥ពាន់នាក់បានភៀសខ្លួនទៅកាន់ប្រទេសជិតខាង។ ខណៈអ្នកដែលបន្សល់ទុក នៅតំបន់សង្រ្គាមប្រឈមមុខនឹងការខ្វះខាតទឹក ភ្លើង អាហារ និងការថែទាំវេជ្ជសាស្រ្ត ស្រ​បពេលដែលប្រហែលមួយភាគបីនៃចំនួនប្រជាជនត្រូវការជំនួយមនុស្សធម៌សូម្បីតែមុន ពេលការប្រយុទ្ធបានចាប់ផ្តើមក៏ដោយ។

 

ការជម្លៀសដែលដឹកនាំដោយបរទេសតាមរយៈផ្លូវគោក សមុទ្រ និងផ្លូវអាកាស បានបង្ហាញ ពីការចាកចេញរាប់ពាន់នាក់ទៀត ដែលភាគច្រើនឆ្លងកាត់កំពង់ផែស៊ូដង់តាមសមុទ្រក្រហម ដែលរហូតមកដល់ពេលនេះតំបន់នេះនៅតែមានសន្តិភាពនៅឡើយ៕