បើតាមរបាយការណ៍របស់ក្រសួងបរិស្ថាន គោលបំណងនៃការបង្កើត  «ប្រព័ន្ធគ្រប់គ្រងទិន្នន័យស្រុកយើង» ដើម្បីរក្សាទុក គ្រប់គ្រង និងវិភាគទិន្នន័យ និងការជួយពង្រឹងដល់ការរៀបចំផែនការ ការសម្រេចចិត្ត ការតាមដាន និងការគ្រប់គ្រងធនធានធម្មជាតិ និងអភិរក្សជីវៈចម្រុះ នៅកម្ពុជា។ 

«ប្រព័ន្ធគ្រប់គ្រងទិន្នន័យស្រុកយើង ជាឧបករណ៍ដ៏ពិសិដ្ឋ ជំនួយដល់ការសម្រេចចិត្តអោយបានត្រឹមត្រូវ និងរៀបចំគោលនយោបាយ ប្រកបដោយភាពជាក់ស្តែង ទាក់ទងនឹងកិច្ចគាំពារបរិស្ថាន ការអភិរក្សជីវចម្រុះ ការគ្រប់គ្រងធនធានធម្មជាតិ សម្បត្តិធម្មជាតិ និងការរស់នៅដោយចីរភាព»។ នេះជាការលើកឡើងរបស់លោក សាយ សំអាល់ រដ្ឋមន្រ្តីក្រសួងបរិស្ថាន។
 

ជាមួយគ្នានេះ «ប្រព័ន្ធ​គ្រប់​គ្រង​ទិន្នន័យ​ស្រុក​យើង»  មានចំណុចសំខាន់ៗចំនួន៤ គឺ ផ្នែកទិន្នន័យ ជាថ្នាក់ឌីជីថល អនុញ្ញាតឱ្យអ្នកប្រើប្រាសរក្សាទុក ទាញយក ទិន្នន័យផ្សេងៗ មកធ្វើការវិភាគ និងផលិតផែនទីតាមតម្រូវការ។ 
 

ចំណុចទី២ ជាផ្នែកគាំទ្រសេចក្តីសម្រេចចិត្ត មានដូចជា GIS Zonation Model សម្រាប់គាំទ្រ និងពន្លឿនការកំណត់ និងការបែងចែកតំបន់គ្រប់គ្រងប្រព័ន្ធតាមដានធនធានព្រៃឈើ និងភ្លើងឆេះ ព្រៃ និងប្រព័ន្ធផ្សេងៗ។
 

ចំណុចទី៣ នៃ«ប្រព័ន្ធ​គ្រប់​គ្រង​ទិន្នន័យ​ស្រុក​យើង»  គឺការពង្រឹងសមត្ថភាពមន្ត្រីថ្នាក់ជាតិ និងក្រោមជាតិ ក្នុងការគ្រប់គ្រងប្រើប្រាស់ ប្រមូល វិភាគ និងចែករំលែកទិន្នន័យ ក្នុងប្រព័ន្ធទិន្នន័យបរិស្ថានស្រុកយើង។ ចំណុចចុងក្រោយ គឺការចូលរួម និងកិច្ចសហប្រតិបត្តិរវាង ក្រសួង ដៃគូអភិវឌ្ឍ អង្គការជាតិ និងអន្តរជាតិ ស្ថាប័នអប់រំ និងស្រាវជ្រាវវិស័យឯកជន និងស្ថាប័នពាក់ព័ន្ធនានា៕