ប្រមុខរដ្ឋាភិបាលកម្ពុជា បន្តថា ក្នុងអំឡុងពេលកម្ពុជារៀបចំព្រឹត្តិការណ៍សំខាន់ៗមួយចំនួន ដូចជា ការប្រកួតកីឡាស៊ីហ្គេមលើកទី៣២ ដែលកំពុងដំណើរការ និងការបោះឆ្នោតជាតិលើកទី៧នាពេលខាងមុខ សុទ្ធសឹងជាគោលដៅនៃការប៉ុនប៉ងវាយប្រហារពីសំណាក់ក្រុមអ្នកជ្រុលនិយម ដើម្បីបំផ្លាញមុខមាត់ប្រទេសជាតិ។ 
 

មេដឹកនាំកម្ពុជា បញ្ជាក់ទៅកាន់កម្លាំងនគរបាលជាតិដូច្នេះថា៖«ជាការពិតណាស់ កិច្ចការទាំងអស់នេះ គឺជាអំរែកដ៏ធ្ងន់ធ្ងរ និងជាវិញ្ញាសាដ៏ស្មុគស្មាញ ដែលតម្រូវឲ្យកងកម្លាំងនគរបាលជាតិមានសមត្ថភាព និងគុណភាពខ្ពស់ រែកពុនដោះស្រាយបញ្ហាប្រឈមទាំងនោះ ដើម្បីបុព្វហេតុសន្តិសុខជាតិ និងភាពសុខដុមរមនារបស់ប្រជាពលរដ្ឋ»។
 

សម្តេច ហ៊ុន សែន លើកឡើងពីបញ្ហាខាងលើនេះ តាមរយៈសារលិខិតជូនពរ ទៅកាន់កងកម្លាំងនគរបាលជាតិ ក្នុងទិវារម្លឹកខួប៧៨ឆ្នាំនៃការបង្កើតនគរបាលជាតិ ដែលនឹងមកដល់នៅថ្ងៃទី១៦ ខែឧសភា ឆ្នាំ២០២៣។ នគរបាលជតិ ត្រូវបានបង្កើតឡើងនៅថ្ងៃទី១៦ ខែឧសភា ឆ្នាំ១៩៤៥។ 
 

យ៉ាងណាក៏ដោយ សម្តេចនាយករដ្ឋមន្រ្តី ហ៊ុន សែន បានសរសេរយ៉ាងច្រើនដល់កម្លាំងនគរបាលជាតិ ដែលប្រឹងប្រែងបំពេញការងារ ដូចជា ទប់ស្កាត់អំពើភេរវកម្ម បង្ក្រាបឧក្រិដ្ឋឆ្លងដែនទាន់ពេលវេលា និងការពារសន្តិសុខផ្ទៃក្នុងបានរឹងមាំ ជាដើម។ ប្រមុខរដ្ឋាភិបាលកម្ពុជា សរសេរទៀតថា ការប្រយុទ្ធប្រឆាំងបទល្មើសគ្រឿងញៀន អំពើជួញដូរមនុស្ស អំពើជួញដូរកម្លាំងពលកម្ម និងល្បែងស៊ីសងគ្រប់ប្រភេទ ទទួលបានលទ្ធផលជាវិជ្ជមាន៕