លោក ម៉ែន​ សាម៉េត​ បញ្ជាក់ថា អ្នកស្រី ឆន សាឡឹង បានទៅពិនិត្យផ្ទៃពោះទៀងទាត់តាមការណែនាំរបស់គ្រូពេទ្យ។ លោក បន្តថា នៅព្រឹកថ្ងៃសុក្រនេះ អ្នកស្រី សាឡឹង បានឈឺពោះខ្លាំង ហើយក្រុមគ្រួសារបាននាំទៅមន្ទីរពេទ្យ ដោយធ្វើដំណើរតាមទូក តែទៅមិនទាន់ ក៏ត្រូវបានក្រុមគ្រូពេទ្យជួយសម្រាលកូននៅលើទូកក្បែរច្រាំងតែម្ដង។
 

លោក ម៉ែន សាម៉េត អះអាងថា នាង បានសម្រាលកូន ពេលទូកធ្វើដំណើរដល់ពាក់កណ្តាល។ លោក មានប្រសាសន៍ថា៖«នេះជាករណីសម្រាលធម្មជាតិតាមធម្មតា តែបើគាត់សម្រាលពិបាកវិញ ខ្ញុំជឿថា ម្ដាយនិងកូនអាចមានបញ្ហា»។ 
 

បើតាមលោក ម៉ែន សាម៉េត អ្នកស្រី ឆន សាឡឹង រស់នៅកោះដាច់ស្រយោលមួយ ដែលស្ថិតក្នុងភូមិចាំយាម(កោះលយ) ឃុំបាក់ខ្លង់ ស្រុកមណ្ឌលសីមា ខេត្តកោះកុង។ បច្ចុប្បន្ន អ្នកស្រី សាឡឹង កំពុងសម្រាកនៅក្នុងមន្ទីរពេទ្យបង្អែកខេត្តកោះកុង។ លោក អះអាងថា នេះជាករណីទី១ ក្នុងឆ្នាំ២០២៣ ដែលមានហេតុការណ៍ស្រ្តីសម្រាលកូននៅលើទូក ខណៈនៅឆ្នាំ២០២២ ធ្លាប់មាន២ករណីរួចមកហើយ។
 

លោក ម៉ែន​ សាម៉េត បានអំពាវនាវដល់ស្រ្តីដែលមានផ្ទៃពោះទាំងអស់ ត្រូវទៅពិនិត្យពោះ ឬពិគ្រោះជាមួយគ្រូពេទ្យឱ្យបានទៀងទាត់នៅមណ្ឌលសុខភាពដែលនៅជិតផ្ទះ រហូតដល់ពេលសម្រាល ដើម្បីត្រៀមខ្លួនឱ្យបានល្អ៕