លោក ជេត ជាលី បានលើកឡើងថា កាលពីដើមឡើយ មនុស្សភាគច្រើនរៀន ដើម្បីធ្វើការឱ្យគេ ប៉ុន្តែសម្រាប់មជ្ឈមណ្ឌលជាតិបណ្ដុះបណ្ដាលធុរកិច្ចថ្មីនៃកម្ពុជា ហៅកាត់ថា Nicc គឺមិនមែនបង្រៀនមនុស្សដើម្បីតែធ្វើការឱ្យគេនោះទេ ។ បើតាមលោក ជាលី Nicc នឹងបង្រៀនឱ្យយុវជនឱ្យចេះបង្កើតការងារឱ្យខ្លួនឯង និងបង្ហាញពីផ្នត់គំនិតថ្មីៗ ដែលចង់ធ្វើទៅតាមការស្រមៃ ឱ្យកា្លយជាការពិត។
 

ត្រង់ចំណុចនេះ សាកលវិទ្យាធិការសាកលវិទ្យាល័យភូមិន្ទភ្នំពេញ បានបញ្ជាក់ថា ៖«អ្វីដែលជាប្រយោជន៍ Nicc បង្រៀនមនុស្សឱ្យផ្លាស់ប្ដូរផ្នត់គំនិត មិនមែនរៀនដើម្បីតែធ្វើការឱ្យគេនោះទេ រៀនដើម្បីមានចំណេះដឹងពិតទៅធ្វើការឱ្យក្រុមហ៊ុនចាស់ទុំណាមួយ ឬក៏អាចចាប់ផ្ដើមក្រុមហ៊ុនរបស់ខ្លួនឯង»។
 

Nicc បានសហការជាមួយក្រុមហ៊ុនឯកជន ដែលមានបទពិសោធន៍ច្រើន ដើម្បីជួបជាមួយយុវជន សិស្សនិស្សិត ដែលមានគំនិតច្នៃប្រឌិតថ្មីៗ ដោយផ្ដោតទៅលើផ្នែកបច្ចេកវិទ្យាឌីជីថល។ លោក ជាលី បានសង្កេតឃើញថា បច្ចុប្បន្នមនុស្សស្ទើរតែពាក់កណ្ដលទៅហើយ ដែលរស់នៅដោយប្រើប្រាស់បច្ចេកវិទ្យាឌីជីថល។ 
 

មជ្ឈមណ្ឌល Nicc គឺជាអ្នកបង្ហាញផ្លូវ និងនាំក្រុមហ៊ុនមានបទពិសោធន៍ជាច្រើន មកចែករំលែកដល់យុវជននិងសិស្សានុសិស្ស ដើម្បីផ្ដល់ធាតុចូលមួយចំនួន សម្រាប់អនុវត្តនូវគំនិត និងចំណេះជំនាញ។
 

សូមជម្រាបថា មជ្ឈមណ្ឌលជាតិបណ្ដុះបណ្ដាលធូរកិច្ចថ្មីនៃកម្ពុជា Nicc គឺជាបុត្រសម្ព័ន្ធមួយរបស់សាលកវិទ្យាល័យភូមិន្ទភ្នំពេញ៕