​

 

 

លោក មឿន ចន្ទ្រា គឺជាប្រធានដេប៉ាតឺម៉ង់អប់រំពេញមួយជីវិត នៃសាកលវិទ្យាល័យភូមិន្ទភ្នំពេញដ៏ចំណាស់ជាងគេនៅកម្ពុជា។ បើតាមលោក មឿន ចន្ទ្រា ការអប់រំពេញមួយជីវិត គឺជាការបណ្តុះទម្លាប់នៃការរៀនឥតឈប់ឈរ ទាំងក្នុងប្រព័ន្ធ ក្រៅប្រព័ន្ធ និងមិនផ្លូវការ។ គោលដៅនៃការអប់រំពេញមួយជីវិត គឺដើម្បីឱ្យយុវជន និងសិស្សនិស្សិត ទទួលបានវិជ្ជាសម្បទា បំនិនសម្បទា ដែលរស់នៅជាមួយគ្នាបានដោយភាពសុខដុមរមនា និងសុភមង្គល​។ លោក មឿន ចន្ទ្រា បន្ថែមដូច្នេះ នៅក្នុងបទសម្ភាសជាមួយសារព័ត៌មានឌីជីថលថ្មីៗ។

 

 

តាមពិតទៅ លោក ចន្ទ្រា ជាអ្នកដឹកនាំដែលមានវ័យក្មេងជាងគេ នៅក្នុងចំណោមប្រធា នដេប៉ាតឺម៉ង់ផ្សេងៗនៅក្នុងសាកលវិទ្យាល័យភូមិន្ទភ្នំពេញ តែដោយសារធ្លាប់មានបទពិសោធន៍​​​ដឹកនាំការងារទាំង​តូច និងធំជាមួយយុវជន ជិត១០ឆ្នាំដែរនោះ ទើប​លោកមានគំនិតសុទិដ្ឋិនិយម នៅក្នុងមុខតំណែងថ្មីរបស់ខ្លួន។ សម្រាប់ប្រធានដេប៉ាតឺម៉ង់រូបនេះ គ្រប់កិច្ចការងារតែងតែឧបសគ្គ និងបញ្ហាប្រឈមខុសៗគ្នា ប៉ុន្តែលោកប្រកាន់ខ្ជាប់នូវគោលការណ៍ ដោះស្រាយបញ្ហាដោយឈរលើ​ប្រយោជន៍រួម។ លោក មឿន ចន្ទ្រា បន្ថែម៖«​ការងារដឹកនាំមិនមែនជារឿងងាយស្រួលពេកទេ តែយើងត្រូវហ៊ានសម្រេចចិត្ត។ ទន្ទឹមនឹងនេះ ខ្ញុំក៏កំពុងតែរៀនតថ្នាក់បណ្ឌិតដែរ ដើម្បីសម្រួលចំណេះដឹងខ្ញុំឱ្យល្អប្រសើរ។ ហើយសំខាន់ យើងជាក្រុមការងារតែមួយ ទោះបីយើងកម្រិតណាក៏ដោយ ហើយមកពីប្រទេសណាក៏ដោយ តែយើងមានគោលដៅតែមួយគត់ គឺធ្វើការ ដើម្បីដេប៉ាតឺម៉ង់របស់យើង និងនិស្សិតរបស់យើង មានសមត្ថភាពគ្រប់គ្រាន់ ហើយឆ្លើយតបជាមួយទីផ្សារការងារ»។ 

 

នៅក្នុងបទសម្ភាសជាមួយសារព័ត៌មានឌីជីថលថ្មីៗ ប្រធានដេប៉ាតឺម៉ង់រូបនេះ ក៏នឹងបន្តឆន្ទៈនៅក្នុងការ​រៀបចំកម្មវិធីសិក្សាឱ្យកាន់តែល្អប្រសើរ ដើម្បីធានាថានិស្សិតដែលបញ្ចប់ការសិក្សាមានសមត្ថភាពពេញលេញសម្រាប់ក្រសោបឱកាសការងារទាំងពេលបច្ចុប្បន្ន និងអនាគត។ លើសពីនេះទៀត លោក មឿន ចន្ទ្រា ក៏បានរៀបចំឱ្យនិស្សិតចុះកម្មសិក្សា នៅតាមបណ្តាស្ថាប័នរដ្ឋ វិស័យឯកជន និងអង្គការជាតិ ក៏ដូចជាអន្តរជាតិដៃគូប្រមាណ៥០ស្ថាប័ន​៕