កីឡាករប៉ារ៉ាលើកទម្ងន់ គង់ សិលា បានឈ្នះមេដាយមាស២តែម្នាក់ឯងលើវិញ្ញាសាលើកទម្ងន់ធ្ងន់បំផុត១០៧គីឡូក្រាម និងការបូកសរុបលទ្ធផលលើកទាំង៣ជុំ នៅមជ្ឈមណ្ឌលជាតិជនពិការតេជោសែន។ ការលើកជុំដំបូង សិលា លើកបាន៥៥គីឡូក្រាម ហើយសរុបទាំង៣ជុំ សម្រេចបាន១៥៨គីឡូក្រាម។

 

សិលា ក្លាយជាអត្តពលិកបុរសដំបូងដែលឈ្នះមេដាយមាសពីក្នុងព្រឹត្តិការណ៍អាស៊ានប៉ារ៉ាហ្គេមនៅកម្ពុជា ដោយម្ចាស់មេដាយមាស៦ទៀត រកបានដោយកីឡាការិនីប៉ារ៉ាអត្តពលកម្ម វិត ចន្ថា ចំនួន៣, កីឡាការិនី ងួន រតនា ១, កីឡាការិនី យិន សូត ១ និងក្រុមកីឡាការិនីបាល់បោះជិះរទេះ ១។

 

គិតត្រឹមម៉ោង១១ព្រឹក ថ្ងៃទី៧ ខែមិថុនា នេះ កម្ពុជា បានឈ្នះមេដាយមាស៨ ប្រាក់១៣ និងសំរឹទ្ធ២៦ ពីអាស៊ានប៉ារ៉ាហ្គេមលើកទី១២៕