អន្តរជាតិ
លោក Pita ថា មិនបានបំពានច្បាប់ហើយនៅតែមានសិទ្ធិប្រជែងតំណែងនាយករដ្ឋមន្ត្រីថៃ
× មេដឹកនាំបក្សឆ្ពោះទៅមុខ (MFP) លោក Pita Limjaroenrat ហាក់មិនបារម្ភនឹងការប៉ុនប៉ងដកសិទ្ធិរបស់លោកក្នុងការប្រជែងជានាយករដ្ឋមន្ត្រីជុំវិញបញ្ហាកម្មសិទ្ធិភាគហ៊ុនក្នុងក្រុមហ៊ុនប្រព័ន្ធផ្សព្វផ្សាយឡើយ។ លោក Pita អះអាងថា មិនបំពានច្បាប់ទេ ហើយគូប្រជែងកំពុងរាំងលោកក្នុងការទទួលបានតួនាទីនាយករដ្ឋមន្រ្តី។
ជាមួយនឹងការគាំទ្រដ៏ច្រើនពីយុវជន បក្សឆ្ពោះទៅមុខបានយកជ័យជម្នះក្នុងការបោះឆ្នោតជាតិកាលពីខែឧសភាដោយបានផ្ដួលក្រុមអភិរក្សនិយមគាំទ្រដោយយោធាកាន់អំណាច៩ឆ្នាំមកហើយ។ យ៉ាងណាមិញ ការបង្កើតរដ្ឋាភិបាលថ្មី និងជ្រើសរើសនាយករដ្ឋមន្ត្រីថ្មីបន្តពីលោក ប្រាយុទ្ធ ចន្ទអូចា កំពុងជួបឧបសគ្គរាំងស្ទះជាច្រើនផងដែរ។
ក្រុមនយោបាយគូប្រជែងមួយចំនួនបានដាក់ពាក្យបណ្ដឹងទៅគណៈកម្មការរៀបចំការបោះឆ្នោតដោយចោទប្រកាន់ថា លោក Pita កាន់កាប់ភាគហ៊ុនចំនួន៤២,០០០នៅក្នុងក្រុមហ៊ុន ប្រព័ន្ធផ្សព្វផ្សាយ ITV Public Company។ ក្រុមហ៊ុននេះបានដំណើរការប៉ុស្តិ៍ទូរទស្សន៍ដ៏ពេញនិយមតាំងពីឆ្នាំ១៩៩៨ មុនបញ្ឈប់ការផ្សព្វផ្សាយទៅវិញក្នុងឆ្នាំ ២០០៧។
តាមលក្ខខណ្ឌរបស់គណៈកម្មការរៀបចំការបោះឆ្នោត បេក្ខជនឈរឈ្មោះបោះឆ្នោតត្រូវបានហាមឃាត់មិនឱ្យកាន់កាប់ភាគហ៊ុននៅក្នុងក្រុមហ៊ុនប្រព័ន្ធផ្សព្វផ្សាយណាមួយឡើយ។ យ៉ាងណាក៏ដោយ លោក Pita សង្កត់ធ្ងន់ថា ការបាត់បង់សម្បទានរបស់ ITV មានន័យថា មិនអាចចាត់ទុកជាអង្គការប្រព័ន្ធផ្សព្វផ្សាយធំបានទេ។
«ទីនេះមានការប៉ុនប៉ងដើម្បីធ្វើឱ្យខ្ញុំចេញពីនយោបាយ»។ លោក Pita លើកឡើងបែបនេះ ដោយបន្ថែមថា លោកបានផ្ទេរភាគហ៊ុនទៅឱ្យសាច់ញាតិកាលពីខែមុនហើយ។ លោកជឿជាក់ថា មិនមានមូលហេតុណាមួយដែលធ្វើឱ្យលោកមិនមានសិទ្ធិក្នុងការប្រជែងយកតំណែងជានាយករដ្ឋមន្ត្រីនោះឡើយ។
លោក Pita វ័យ ៤២ ឆ្នាំ លើកឡើងទៀតថា ភាគហ៊ុននេះជាផ្នែកមួយនៃទ្រព្យសម្បត្តិរបស់ឪពុក ចុងរបស់លោកដែលបានប្រកាសទៅកាន់ទីភ្នាក់ងារប្រឆាំងអំពើពុករលួយរួចមកហើយ៕
© រក្សាសិទ្ធិដោយ thmeythmey.com