អន្តរជាតិ
ក្រុមយុវជនកូរ៉េខាងជើង បរិច្ចាគគ្រាប់រ៉ុក្កែតដល់យោធាដើម្បីបង្ហាញពីកម្លាំងស្នេហាជាតិខ្លាំងក្លា
× ទីភ្នាក់ងារកណ្ដាលកូរ៉េខាងជើង KCNA រាយការណ៍នៅថ្ងៃទី៨ ខែមិថុនាថា ក្រុមយុវជនកូរ៉េខាងជើងមួយ បានបរិច្ចាគគ្រាប់រ៉ុក្កែតដល់យោធានៅក្នុងការបង្ហាញភាពស្នេហាជាតិដ៏ក្លៀវក្លាស្របពេលរដ្ឋឯកោមួយនេះប្រឈមមុខការគំរាមកំហែងពីបរទេសកាន់តែខ្លាំងឡើង។
ការបរិច្ចាគសម្ភារយោធាបានធ្វើឡើងនៅក្នុងពិធីមួយកាលពីថ្ងៃទី៧ ខែមិថុនា នៅពេលសហភាពកុមារកូរ៉េ (KCU) ដែលជាក្រុមយុវជននយោបាយបានប្រារព្ធខួបលើកទី៧៧របស់ខ្លួន។ សហភាព KCU ដែលសមាជិករបស់ពួកគេត្រូវបានស្គាល់ដោយកន្សែងក្រហម ត្រូវបានបង្កើតឡើងដើម្បីលើកកម្ពស់មនោគមវិជ្ជានយោបាយរបស់កូរ៉េខាងជើងដូចជាការពឹងផ្អែកលើខ្លួនឯងជាដើម។
ប្រព័ន្ធផ្សរដ្ឋកូរ៉េខាងជើង មិនបានបង្ហាញពីវិធីដែលថវិកាត្រូវបានរៃអង្គាសសម្រាប់ទិញបរិក្ខារយោធាដោយរបៀបណាឡើយ។ ឧបករណ៍បាញ់រ៉ុក្កែតដែលបានបរិច្ចាគត្រូវបានគេដាក់ឈ្មោះថា សុនយ៉ុន (Sonyeon) ដែលមានន័យថាក្មេងប្រុសនៅក្នុងភាសាកូរ៉េ ទោះបីជាសមាជិកក្រុមយុវជននេះរួមមានទាំងក្មេងប្រុស និងក្មេងស្រីក៏ដោយ។
សូមបញ្ជាក់ថា ក្នុងរយៈពេលប៉ុន្មានខែថ្មីៗនេះ កូរ៉េខាងជើងបានបង្កើនកិច្ចខិតខំឃោសនា និងការផ្ញើសារជាសាធារណៈរួមទាំងការរៀបចំបាតុកម្មដែលរូបសំណាករបស់មេដឹកនាំកូរ៉េខាងត្បូង និង អាម៉េរិកត្រូវបានដុតចោលដើម្បីជំរុញទឹកចិត្តប្រជាជន។
កន្លងមក កូរ៉េខាងជើងច្រានចោលដំណោះស្រាយរបស់ក្រុមប្រឹក្សាសន្តិសុខអង្គការសហប្រជាជាតិ ដោយការបាញ់សាកល្បងមីស៊ីលជាច្រើនគ្រាប់រួមទាំងមីស៊ីលផ្លោងអន្តរទ្វីបដ៏ធំបំផុតរបស់ខ្លួននៅឆ្នាំនេះ។ កាលពីសប្តាហ៍មុន ប្រទេសផ្ដាច់ការមួយនេះ បានទទួលការថ្កោលទោសជាអន្តរជាតិជុំវិញការបាញ់បង្ហោះផ្កាយស៊ើបការណ៍ដំបូងរបស់ខ្លួនទោះបីជាមិនជោគជ័យក៏ដោយ៕
© រក្សាសិទ្ធិដោយ thmeythmey.com