អន្តរជាតិ
នយោបាយអន្តរជាតិ
កូរ៉េខាងត្បូងថា ក្រុមប្រឹក្សាសន្តិសុខមិនអាចដោះស្រាយការបង្កហេតុរបស់កូរ៉េខាងជើងបាន
×
រដ្ឋមន្ត្រីការបរទេសកូរ៉េខាងត្បូង ផាក ជីន (Park Jin) លើកឡើងថា ក្រុមប្រឹក្សាសន្តិសុខអង្គការសហប្រជាជាតិ (UNSC) នៅតែខ្វះខាតសមត្ថភាពក្នុងការដោះស្រាយការបង្កហេតុខុសច្បាប់ដោយកូរ៉េខាងជើង។ លោកបង្ហាញពីចេតនារបស់ទីក្រុងសេអ៊ូលក្នុងការជំរុញឱ្យចិននិងរុស្ស៊ីដើរតួនាទីស្ថាបនាចំពោះរឿងនេះផងដែរ។
នៅក្នុងបទសម្ភាសជាមួយទីភ្នាក់ងារសារព័ត៌មាន Yonhap លោក ផាក ជីន បានកត់សម្គាល់ UNSC ថា ជាស្ថាប័នធ្វើការសម្រេចចិត្តខ្ពស់បំផុតរបស់អង្គការសហប្រជាជាតិ (UN) ប៉ុន្តែមុខងាររបស់ស្ថាប័ននេះបែរជាខូចខាតក្នុងការដោះស្រាយបញ្ហាបង្កហេតុខុសច្បាប់ដោយក្រុងព្យុងយ៉ាងទៅវិញ។
រដ្ឋមន្ត្រីរូបនេះបានសំដៅទៅលើការប្រឆាំងម្តងហើយម្តងទៀតដោយចិន និងរុស្ស៊ីដែលជាសមាជិកអចិន្ត្រៃយ៍ពីរក្នុងចំណោមសមាជិកក្រុមប្រឹក្សាទាំងប្រាំ និងមានអំណាចវេតូ ហើយដែលជារឿយៗជំទាស់នឹងដំណោះស្រាយដាក់ទណ្ឌកម្មបន្ថែមលើទីក្រុងព្យុងយ៉ាង។
«ខ្ញុំជឿថា ការបន្តធ្វើបែបនេះគឺមិនអំណោយផលដល់សន្តិភាព និងសន្តិសុខអន្តរជាតិទេ»។ លោក ផាក សង្កត់ធ្ងន់បែបនេះចំពោះការជំទាស់ម្ដងហើយម្ដងទៀតរបស់ក្រុងប៉េកាំង និងក្រុងមូស្គូ។ រដ្ឋមន្ត្រីរូបនេះបន្ថែមថា ទីក្រុងសេអ៊ូលដែលត្រូវបានជ្រើសរើសថ្មីជាសមាជិកមិនអចិន្ត្រៃយ៍ក្រុមប្រឹក្សាសម្រាប់ឆ្នាំ២០២៤-២០២៥ មានបំណងជំរុញចិន និងរុស្ស៊ីឱ្យដើរតួនាទីស្ថាបនាដើម្បីដោះស្រាយការគំរាមរបស់កូរ៉េខាងជើងទាំងក្នុងនិងក្រៅក្រុមប្រឹក្សា។ រឿងដែលចាំបាច់សម្រាប់កូរ៉េខាងត្បូងនោះគឺបំពេញតួនាទី និងកាតព្វកិច្ចតាមស្មារតីនៃធម្មនុញ្ញ UN ដូចជាសន្តិភាព សិទ្ធិមនុស្ស និងការអភិវឌ្ឍ។
នេះជាលើកទីបីហើយសម្រាប់កូរ៉េខាងត្បូងដែលធ្វើជាសមាជិកមិនអចិន្រ្តៃយ៍មួយក្នុងចំណោម។ ប្រទេសមួយនេះបានកាន់តំណែងជាលើកដំបូងក្នុងអំឡុងអាណត្តិឆ្នាំ១៩៩៦-១៩៩៧។ លោក ផាក បានវាយតម្លៃថា ចាប់តាំងពីពេលនោះមក ប្រទេសនេះបានរីកចម្រើនយ៉ាងខ្លាំងចំពោះភាពរឹងមាំរបស់ខ្លួននៅលើឆាកពិភពលោក៕
Tag:
កូរ៉េខាងត្បូង
កូរ៉េខាងជើង
© រក្សាសិទ្ធិដោយ thmeythmey.com