ជាតិ
អាជ្ញាធរបង្រ្កាបបានសាច់មាន់ និងប្រហិត ខូចគុណភាពនាំចូលពីថៃ ចំនួន ៨តោន រូបភាព៖ លោក ហ៊ុន សារ៉ាត់ អនុប្រធានអគ្គនាយកដ្ឋានសុខភាពសត្វ និងផលិតកម្មសត្វ
× ភ្នំពេញ៖ អាជ្ញាធរកម្ពុជា បង្រ្កាបបានសាច់មាន់ និងប្រហិត ខូចគុណភាព៨តោន ដែលនាំចូលគ្មានច្បាប់ពីប្រទេសថៃ។ នេះបើយោងតាម លោក ហ៊ុន សារ៉ាត់ អនុប្រធានអគ្គនាយកដ្ឋានសុខភាពសត្វ និងផលិតកម្មសត្វ នៅថ្ងៃទី ១៥ ខែមិថុនា។
លោក ហ៊ុន សារ៉ាត់ បានបញ្ជាក់ថា នៅព្រឹក ថ្ងៃទី១៥ ខែមិថុនា ក្រុមការងារអន្តរាគមន៍បង្ក្រាបបទល្មើសចលនាសត្វ នៃអគ្គនាយកដ្ឋានសុខភាពសត្វ និងផលិតកម្មសត្វ បានសហការជាមួយការិយាល័យផលិតកម្ម និងបសុព្យាបាលខេត្តបន្ទាយមានជ័យ ចុះត្រួតពិនិត្យទីតាំងមួយកន្លែងនៅចំណុចខាងជើងផ្សារត្រី ភូមិបាលិលេយ្យ១ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ ដោយរកឃើញសាច់សត្វមាន់ និងប្រហិតចម្រុះចំនួន ៨ ៥២០គីឡូក្រាម នាំចូលមកពីប្រទេសថៃ ដោយគ្មានលិខិតអនុញ្ញាតអ្វីទាំងអស់។
ផលិតផលមានកំណើតពីសត្វទាំងនេះ ត្រូវបានក្រុមមន្រ្តីជំនាញពិនិត្យឃើញថា មិនបានរក្សាទុកឱ្យបានត្រឹមត្រូវតាមលក្ខណៈបច្ចេកទេស ទាំងសីតុណ្ហភាព និងអនាម័យ។ ករណីនេះ ត្រូវបានក្រុមការងារអន្តរាគមន៍បង្ក្រាបបទល្មើសចលនាសត្វ នៃអគ្គនាយកដ្ឋានសុខភាពសត្វ និងផលិតកម្មសត្វ ស្នើសុំការអនុញ្ញាតពីព្រះរាជអាជ្ញាខេត្តបន្ទាយមានជ័យ ដុតចោល វត្ថុតាងបទល្មើសខាងលើនេះតាមវិធានបសុពេទ្យ៕
Tag:
សាច់សត្វមាន់
ប្រហិតចម្រុះ
សុខភាពសត្វ និងផលិតកម្មសត្វ
© រក្សាសិទ្ធិដោយ thmeythmey.com