ក្នុងដំណើរទស្សនកិច្ចនៅស្ថាប័នកាសែត Guangxi Daily ដែលមានអាយុកាល ៧៤ឆ្នាំមួយនេះ ក៏មានកម្មវិធីចុះ​ហត្ថលេខាលើកិច្ចសហប្រតិបត្តិការប្រព័ន្ធផ្សព្វផ្សាយ រវាងកាសែត The Commercial News និងស៊ីស៊ីថាមស៍ និងកាសែត Guangxi Daily​ ដែរ។ លើសពីនេះ ប្រតិភូអ្នកសារព័ត៌មានទាំង១៤រូប ដែលចូលរួមក្នុងទស្សនកិច្ចនេះ ត្រូវបាន​កាសែត Guangxi Daily តែងតាំងជាអ្នករាយការណ៍កិត្តិយស ប្រចាំតំបន់អាស៊ាន​។

 

 

លោក ផ្លុង វិចិត្រ ដែលតំណាងប្រតិភូអ្នកសារព័ត៌មានកម្ពុជា និងជាអគ្គនាយកកាសែត The Commercial News និងស៊ីស៊ីថាមស៍ បានគូសបញ្ជាក់ថា ​ដំណើរទស្សកិច្ច​រយៈពេល៦ថ្ងៃនេះ បានធ្វើប្រតិភូអ្នកសារព័ត៌មានកម្ពុជា ស្វែងយល់​ពីវីធីមួយចំនួន​របស់រដ្ឋាភិបាលចិន ក្នុងការកាត់បន្ថយភាពក្រីក្រ និងលើកកម្ពស់ជីវភាពរស់នៅរបស់ប្រជាពលរដ្ឋ។ ​លោក ផ្លុង វិចិត្រ ​ក៏បានចាត់ទុកថា ដំណើរទស្សនកិច្ចទៅកាន់តំបន់ឧស្សាហកម្ម ផលិតកម្ម និងទេសចរណ៍ ជាច្រើននៅក្នុងខេត្តក្វាងស៊ី រយៈពេល៦ថ្ងៃនេះ ក៏ជាបទពិសោធល្អៗ សម្រាប់កម្ពុជាយកទៅសិក្សា​ផងដែរ។ 

 

 

បន្ថែមពីការកោតសរសើរពីសក្តានុពល និងភាពរីកចម្រើនដ៏ឆាប់រហ័ស នៃទីក្រុងណាននីង ខេត្តក្វាងស៊ី តំណាងប្រតិភូអ្នកសារព័ត៌មានកម្ពុជា ក៏សង្ឃឹមដែរថា តាមរយៈសារព័ត៌មាន កិច្ចសហប្រតិបត្តិការរវាងកម្ពុជា និងចិន កាន់តែស្អិតល្មួត។ «យើងខ្ញុំសង្ឃឹមថា ថ្ងៃខាងមុខពង្រឹងកិច្ចសហប្រតិបត្តការជាមួយGUANGXI DAILY ឱ្យកាន់តែស្អិតល្មួត រួមគ្នានិយាយពីរឿងល្អរបស់កម្ពុជា និងប្រទេសចិន តាមរយៈព័ត៌មានទាំងភាសាខ្មែរ និងចិន និយាយរឿងល្អៗពីចិន និងតាមរយៈ GUANGXI DAILY រករឿងល្អៗពីកម្ពុជាអោយប្រជាជនចិនបានស្គាល់»។
 

ជុំវិញការបង្កើនកិច្ចសហប្រតិបត្តិការរវាងប្រព័ន្ធផ្សព្វផ្សាយ នៃប្រទេសទាំង២នេះ លោក​ មរ យឹ លី ជាប្រធានផ្នែកកិច្ចការអាស៊ាននៃកាសែត GuangXi Daily បានលើកឡើងថា​ ​វាមានសារៈសំខាន់ជាវិជ្ជមាន ក្នុងការលើកកម្ពស់កិច្ចសហប្រតិបត្តិការប្រព័ន្ធផ្សព្វផ្សាយចិន-អាស៊ាន ការនិទានរឿងរបស់ចិន និងការផ្សព្វផ្សាយសំឡេងដ៏ល្អរបស់ក្វាងស៊ី​។ 

 

 

បើតាមលោក​ មរ យឹ លី នេះជាដំណើរទស្សកិច្ចរបស់ប្រតិភូសារព័ត៌មានកម្ពុជា ដែលជាដៃគូសារព័ត៌មានបរទេសលើកដំបូង ក្រោយវិបត្តិកូវីដ-១៩  ដែល Guangxi Daily បានរៀបចំឡើង។ ទស្សនកិច្ចនេះ ក៏ស្របពេលដែលឆ្នាំនេះ គឺជាខួបលើកទី៦៥ នៃការបង្កើតទំនាក់ទំនងការទូតរវាងចិន និងកម្ពុជា និងជាឆ្នាំមិត្តភាពចិន-កម្ពុជា​​ ក៏ជាខួបលើកទី២០ នៃពិព័រណ៍ចិន-អាស៊ាន។ ចាត់ទុកថា ទស្សនកិច្ច នេះ ក៏នឹងធ្វើឱ្យមានការរួមចំណែកជាវិជ្ជមានដល់ការរួមគ្នា កសាងសហគមន៍ចិន-អាស៊ាន ឱ្យកាន់តែជិតស្និទ្ធ ជាមួយនឹងអនាគតរួមគ្នា។ ​លោក​ មរ យឹ លី បន្ថែមដូច្នេះ ដោយបានបញ្ជាក់ថា៖«នេះជាការបង្ហាញភាពទំនាក់ទំនងអន្តរជាតិ និងការពង្រឹងកិច្ចសហប្រតិបត្តិការក្នុងប្រព័ន្ធផ្សព្វផ្សាយអន្តរជាតិ និងការផ្លាស់ប្តូរ»។

 

 

សូមជម្រាបដែរថា ក្នុងដំណើរទស្សនកិច្ចរយៈពេល៦ថ្ងៃ នៅក្នុងប្រទេសចិន ប្រតិភូអ្នកសារព័ត៌មានកម្ពុជា បានធ្វើទស្សនកិច្ចទៅទីក្រុងកំពង់ផែវៃឆ្លាត ក្នុងក្រុងឈីងចូវ។ ទស្សនកិច្ចទីក្រុងលីវចូវ ដែល​ត្រូវបានចាត់ទុកជា​មជ្ឈមណ្ឌលផលិតរថយន្ត​ និងនាំចេញមីជូរហឹរ ​ព្រមទាំងមានឱកាសទៅកាន់តំបន់ទេសចរណ៍ដ៏ស្រស់ស្អាត នៅក្រុងគួយលីង៕

 

: