ភាពតានតឹងរបស់អាម៉េរិក និងចិនបន្តកើនឡើងបន្ថែមទៀត ក្រោយមេដឹកនាំអាម៉េរិកបានរិះគន់ថា ចិន​ដឹកនាំដោយមេដឹកនាំផ្ដាច់ការ។ ក្រុងប៉េកាំងក៏តបវិញដោយចាត់ទុកសម្ដីលោក ចូ បៃឌិន គឺផ្ទុយ​ទាំង​ស្រុងពីការពិត បំពានយ៉ាងធ្ងន់ធ្ងរលើការទូត សេចក្តីថ្លៃថ្នូរខាងនយោបាយរបស់ចិន និងព្រម​ទាំង​ជា​ការញុះញង់ផ្នែកនយោបាយយ៉ាងធ្ងន់ធ្ងរផងដែរ។

 

ទាក់ទងរឿងនេះ នាយករដ្ឋមន្រ្តីនូវែលសេឡង់ Christ Hipkin ដែលគ្រោងធ្វើទស្សនកិច្ចនៅទីក្រុងប៉េកាំង ក៏ចេញមុខនិយាយដែរ។ លោកមិនយល់ស្របនឹងសម្ដីលោក បៃឌិន ឡើយ។

 

«ទេ ហើយទម្រង់រដ្ឋាភិបាលដែលចិនមាន ជាអ្វីដែលសំខាន់សម្រាប់ប្រជាជនចិន»។ នាយករដ្ឋមន្ត្រី​នូវែលសេឡង់ប្រាប់អ្នកសារព័ត៌មានបែបនេះនៅថ្ងៃទី២២ ខែមិថុនា។

 

ទាក់ទងនឹងទម្រង់រដ្ឋាភិបាលនេះផងដែរ លោក Hipkins និយាយដែរថា ប្រសិនបើប្រជាជន​ចិន​ចង់​ផ្លាស់ប្តូរប្រព័ន្ធរដ្ឋាភិបាលរបស់ពួកគេ វាជាបញ្ហាមួយសម្រាប់ពួកគេប៉ុណ្ណោះ។

 

លោក Hipkins គ្រោងនឹងធ្វើទស្សនកិច្ចនៅចិនចាប់ពីថ្ងៃទី២៥ ដល់ថ្ងៃទី៣០ ខែមិថុនា ដោយដឹកនាំ​គណៈប្រតិភូពាណិជ្ជកម្មដែលរួមមានក្រុមហ៊ុនធំៗមួយចំនួនរបស់នូវែលសេឡង់ផងដែរ។ លោក​នឹង​ជួបលោក ស៊ី នាយករដ្ឋមន្ត្រី លី ឈាំង និងប្រធានគណៈកម្មាធិការអចិន្ត្រៃយ៍នៃសភាប្រជាជន ចាវ ឡឹជី ដែរ។ ការប្រែប្រួលកាសធាតុ ស្ថិរភាពសេដ្ឋកិច្ច សន្តិសុខក្នុងតំបន់ និងពិភពលោក សិទ្ធិមនុស្ស និង សង្រ្គាមនៅអ៊ុយក្រែន ជាប្រធានបទនៃទស្សនកិច្ចនេះ។