និស្សិត ១ ៨៨២នាក់ បញ្ចប់ការសិក្សាដោយជោគជ័យ និង បានសញ្ញាបត្រពីសាកលវិទ្យាល័យសេដ្ឋកិច្ចនិងហិរញ្ញវត្ថុ

ជាតិ

អត្ថបទពាណិជ្ជកម្ម

និស្សិត ១ ៨៨២នាក់ បញ្ចប់ការសិក្សាដោយជោគជ័យ និង បានសញ្ញាបត្រពីសាកលវិទ្យាល័យសេដ្ឋកិច្ចនិងហិរញ្ញវត្ថុ

23, Jun 2023 , 7:31 pm

រូបភាព

ដោយ: សារព័ត៌មានថ្មីៗ

ភ្នំពេញ៖ និស្សិតជ័យលាភីបញ្ចប់ការសិក្សាថ្នាក់បរិញ្ញាបត្ររង បរិញ្ញាបត្រ និង បរិញ្ញាបត្រជាន់ខ្ពស់ ចំនួន ១ ៨៨២ នាក់ (នារី ១ ៤៩៦ នាក់) របស់សាកលវិទ្យាល័យសេដ្ឋកិច្ចនិងហិរញ្ញវត្ថុ បានបញ្ចប់ការសិក្សាដោយជោគជ័យ និង បានទទួលសញ្ញាបត្រ នាព្រឹកថ្ងៃទី ២៣ មិថុនា។ ពិធីប្រគល់សញ្ញាបត្រនេះ ត្រូវបានធ្វើឡើងក្រោមវត្តមាន លោក អិន អេម នាយកវិទ្យាស្ថានសេដ្ឋកិច្ចនិងហិរញ្ញវត្ថុ និងជាប្រធានក្រុមប្រឹក្សាវិទ្យាសាស្ត្រនៃសាកលវិទ្យាល័យសេដ្ឋកិច្ចនិងហិរញ្ញវត្ថុ។

សាកលវិទ្យាល័យសេដ្ឋកិច្ចនិងហិរញ្ញវត្ថុ ចាប់ផ្តើមបណ្តុះបណ្តាលដំបូងក្នុងឆ្នាំ ២០១១ លើជំនាញ គណនេយ្យនិងហិរញ្ញវត្ថុ, ធនាគារនិងហិរញ្ញវត្ថុ, ហិរញ្ញវត្ថុ, គ្រប់គ្រងពាណិជ្ជកម្ម, វិទ្យាសាស្ត្រសេដ្ឋកិច្ច និង ពន្ធដារនិងសវនកម្ម។ បើតាមលោក ជួន រតនៈ សាកលវិទ្យាធិការសាកលវិទ្យាល័យសេដ្ឋកិច្ចនិងហិរញ្ញវត្ថុ បច្ចុប្បន្ន សាកលវិទ្យាល័យ កំពុងបន្តអនុវត្តយ៉ាងសកម្មនូវបេសកកម្មកសាង និង អភិវឌ្ឍធនធានមនុស្ស ស្របតាមចក្ខុវិស័យក្នុងការអភិវឌ្ឍជាជំហានៗ ដើម្បីប្រែក្លាយជា គ្រឹះស្ថានឧត្តមសិក្សាឈានមុខមួយនៅកម្ពុជា លើជំនាញពាក់ព័ន្ធនឹងការគ្រប់គ្រងសេដ្ឋកិច្ច និង ហិរញ្ញវត្ថុ ។ លើសពីនេះ សាកលវិទ្យាល័យកំពុងបង្កើនកិច្ចសហការយ៉ាងសកម្មជាមួយអង្គភាពជំនាញពាក់ព័ន្ធ របស់ក្រសួងសេដ្ឋកិច្ចនិងហិរញ្ញវត្ថុ ដូចជា វិទ្យាស្ថានសេដ្ឋកិច្ចនិងហិរញ្ញវត្ថុ, និយ័តករអាជីវកម្មអចលនវត្ថុនិងបញ្ចាំ, មជ្ឈមណ្ឌលអភិវឌ្ឍធុរកិច្ច និង លេខាធិការដ្ឋានក្រុមការងារគ្រប់គ្រងប្រព័ន្ធបច្ចេកវិទ្យាព័ត៌មានគ្រប់គ្រងហិរញ្ញវត្ថុសាធារណៈ (FMIS)។

កិច្ចសហការនេះធ្វើឡើងក្នុងគោលបំណងបង្កើនការចូលរួមចំណែកកសាង និង ការអភិវឌ្ឍសមត្ថភាពជូនមន្ត្រីរាជការ លើជំនាញសម្រាប់ការគ្រប់គ្រងហិរញ្ញវត្ថុសាធារណៈ ពិសេសសម្រាប់អនុវត្តការកែទម្រង់ការគ្រប់គ្រងហិរញ្ញវត្ថុសាធារណៈ បន្ថែមលើកម្មវិធីបណ្តុះបណ្តាលជាប្រក្រតីសម្រាប់និស្សិត និង សាធារណជនទូទៅ ដោយមានកិច្ចសហការពីស្ថាប័ន Inspire Professional ប្រទេសម៉ាឡេស៊ី , ACCA Cambodia, សមាគមគ្រឹះស្ថានឧត្តមសិក្សាកម្ពុជា, សមាគមអ្នកវាយតម្លៃនិងភ្នាក់ងារអចលនវត្ថុកម្ពុជា, សាកលវិទ្យាល័យឆាលស្ទឺត-ប្រទេសអូស្រ្តាលី និង ក្រុមហ៊ុនបច្ចេកវិទ្យាលំដាប់អន្តរជាតិ Oracle ។

លទ្ធផលស្ទង់មតិប្រចាំឆ្នាំ២០២៣របស់សាកលវិទ្យាធិការសាកលវិទ្យាល័យសេដ្ឋកិច្ចនិងហិរញ្ញវត្ថុ បង្ហាញថា ក្នុងចំណោមនិស្សិតជ័យលាភីដែលត្រូវទទួលសញ្ញាបត្រពេលនេះ មានជ័យលាភីប្រមាណ ៨៧,៤ភាគរយ កំពុងបំពេញការងារក្នុងវិស័យសាធារណៈ និង ឯកជន (វិស័យសាធារណៈ១៦ភាគរយ, ឯកជន ៨៤ភាគរយ), ដឹកនាំអាជីវកម្មផ្ទាល់ខ្លួន ៩,៧ភាគរយ និង ២,៩ភាគរយ កំពុងបំពេញការងារផង និង បន្តការសិក្សានៅថ្នាក់បន្តផង ។

ជាមួយគ្នានេះ លោក អិន អេម នាយកវិទ្យាស្ថានសេដ្ឋកិច្ចនិងហិរញ្ញវត្ថុ បានវាយតម្លៃខ្ពស់ចំពោះសាកលវិទ្យាល័យសេដ្ឋកិច្ចនិងហិរញ្ញវត្ថុ ដែលបានសហការយ៉ាងជិតស្និទ្ធជាមួយវិទ្យាស្ថានសេដ្ឋកិច្ចនិងហិរញ្ញវត្ថុ, និយ័តករអាជីវកម្មអចលនវត្ថុនិងបញ្ចាំ និង លេខាធិការដ្ឋានក្រុមការងារគ្រប់គ្រងប្រព័ន្ធបច្ចេកវិទ្យាព័ត៌មានគ្រប់គ្រងហិរញ្ញវត្ថុសាធារណៈ (FMIS) នៃក្រសួងសេដ្ឋកិច្ចនិងហិរញ្ញវត្ថុ ក្នុងការបណ្តុះបណ្តាល និង កសាងសមត្ថភាពជូនមន្រ្តីរាជការ និង សាធារណជន លើជំនាញសម្រាប់អនុវត្តការកែទម្រង់ការគ្រប់គ្រងហិរញ្ញវត្ថុសាធារណៈ ដោយទទួលបានលទ្ធផលគួរឱ្យកត់សម្គាល់ ព្រមទាំងទទួលបានការគាំទ្រពីក្រសួងស្ថាប័នរដ្ឋ, ក្រុមហ៊ុនឯកជន, ធនាគារ, សាធារណជន, សិស្ស-និស្សិត សាស្រ្តាចារ្យ, អាណាព្យាបាល ព្រមទាំងមានការទទួលស្គាល់ពីក្រសួងអប់រំ យុវជន និងកីឡា និង គណៈកម្មការទទួលស្គាល់គុណភាពអប់រំកម្ពុជា (គ.ទ.ក) លើគុណភាពអប់រំ និង បណ្តុះបណ្តាល ដែលកំពុងបន្តដំណើរឆ្ពោះទៅមុខ ក្នុងទិសដៅដ៏ត្រឹមត្រូវប្រកបដោយគុណភាព និង សក្តានុពល ៕

អត្ថបទពាណិជ្ជកម្ម