ក្នុងដំណើរទស្សនកិច្ចនេះលោក ផាម មិញជិញ នឹងផ្តោតលើការស្វែងរកដំណោះស្រាយជាក់លាក់ ដើម្បីជំរុញកិច្ចសហប្រតិបត្តិការសេដ្ឋកិច្ច និងពាណិជ្ជកម្ម ជាពិសេសពាណិជ្ជកម្មតាមព្រំដែន ក៏ដូចជាពន្លឿនការជំរុញការអនុវត្តគម្រោងហេដ្ឋារចនាសម្ព័ន្ធសំខាន់ៗដែលនៅសេសសល់រវាងប្រទេសទាំងពីរ។

 

បើតាមលោក ង្វៀន មិញវូ អនុរដ្ឋមន្ត្រីការបរទេសវៀតណាម សកម្មភាពទាំងអស់នេះ គឺជារួមចំណែកលើកកម្ពស់ការជឿទុកចិត្តផ្នែកនយោបាយ ដើម្បីជំរុញការស្វែងរកដំណោះស្រាយចំពោះបញ្ហាផ្សេងៗ រួមទាំងបញ្ហានៅសមុទ្រចិនខាងត្បូងផងដែរ។ 

 

ជំនួបប្រចាំឆ្នាំនៃប្រទេសរីកចម្រើនថ្មីដែលរៀបចំដោយវេទិកាសេដ្ឋកិច្ចពិភពលោក (WEF) នៅទីក្រុងធានជីន មានការចូលរួមពីថ្នាក់ដឹកនាំរដ្ឋាភិបាលជាច្រើន និងអាជីវកម្មជាង ១០០០ក្រុមហ៊ុនដែលប្រព្រឹត្តទៅក្នុងបរិបទនៃការធ្លាក់ចុះសេដ្ឋកិច្ចក្នុងតំបន់ និងពិភពលោក ស្របពេលដែលប្រទេសនានាកំពុងស្វែងរកមធ្យោបាយជំរុញម៉ាស៊ីនកំណើនថ្មី ដើម្បីស្តារសេដ្ឋកិច្ច។

 

ចិនគឺជាដៃគូពាណិជ្ជកម្មដ៏ធំបំផុតរបស់វៀតណាម អស់រយៈពេលជាច្រើនឆ្នាំជាប់ៗគ្នា ខណៈដែលវៀតណាមគឺជាដៃគូធំបំផុតរបស់ចិននៅក្នុងអាស៊ាន។ យោងតាមអគ្គនាយកដ្ឋានគយវៀតណាម ទំហំពាណិជ្ជកម្មទ្វេភាគីសរុបក្នុងឆ្នាំ ២០២២ នឹងឈានដល់ ១៧៥,៦ ពាន់លានដុល្លារ។

 

គិតត្រឹមខែមីនា លំហូរទុនវិនិយោគសរុបពីចិន ចូលវៀតណាម បានកើនឡើងដល់ ២៣,៨៥ពាន់លានដុល្លារ ជាមួយនឹងគម្រោងសរុបចំនួន ៣៦៥១គម្រោង ដែលជាប់ចំណាត់ថ្នាក់ទី ៦ ក្នុងចំណោមប្រទេសដែលបានវិនិយោគច្រើនជាងគេនៅវៀតណាម។ នេះបើតាមក្រសួងផែនការ និងវិនិយោគវៀតណាម។

 

កាលពីខែតុលាឆ្នាំ ២០២២ អគ្គលេខាបក្សលោក ង្វៀន ហ្វូជុង បានទៅបំពេញទស្សនកិច្ចនៅប្រទេសចិន។ លោក គឺជាមេដឹកនាំជាន់ខ្ពស់បរទេសដំបូងគេដែលមកបំពេញទស្សនកិច្ចនៅចិនបន្ទាប់ពីសមាជជាតិលើកទី២០ នៃបក្សកុម្មុយនីស្តចិន។ 
 

WEF ជាវេទិកាពិភពលោកដ៏មានកិត្យានុភាពមួយដែលទាក់ទាញចំណាប់អារម្មណ៍ និងការចូលរួមពីថ្នាក់ដឹកនាំប្រទេស អង្គការអន្តរជាតិ ក៏ដូចជាសាជីវកម្ម និងក្រុមហ៊ុនឈានមុខគេរបស់ពិភពលោក។ វៀតណាម និង WEF មានទំនាក់ទំនងតាំងពីឆ្នាំ ១៩៨៩ ហើយតែងតែអញ្ជើញវៀតណាមឱ្យចូលរួមកិច្ចប្រជុំប្រចាំឆ្នាំនៅទីក្រុង Davos និងសន្និសីទ WEF ស្តីពីអាស៊ីបូព៌ា។

 

ក្នុងកំឡុងខែវិច្ឆិកា ឆ្នាំ២០២២ នាយករដ្ឋមន្រ្តីវៀតណាមរូបនេះ បានជួបជាមួយប្រធាន WEF ដោយលោកបានស្នើឱ្យ WEF ជួយធ្វើពិពិធកម្មទីផ្សារសម្រាប់ទំនិញវៀតណាម និងលើកកំពស់ជំហររបស់ខ្លួនក្នុងខ្សែសង្វាក់ផ្គត់ផ្គង់ក្នុងតំបន់ និងពិភពលោក។

 

លោក Klaus Schwab ដែលជាប្រធាន WEF បានប្តេជ្ញាជំរុញកិច្ចសហប្រតិបត្តិការជាមួយវៀតណាម ដោយអះអាងថានឹងធ្វើការយ៉ាងជិតស្និទ្ធដើម្បីស្នើ និងអនុវត្តគម្រោងសហប្រតិបត្តិការដូចជាមជ្ឈមណ្ឌលតភ្ជាប់បដិវត្តន៍ឧស្សាហកម្ម 4.0 ការបណ្តុះបណ្តាលជំនាញឌីជីថលសម្រាប់ប្រជាជន ជំរុញការផ្លាស់ប្តូរបៃតងដល់វៀតណាម៕