ជាមួយកញ្ចប់ជំនួយថ្មី ការផ្ដល់ជំនួយរបស់អូស្ដ្រាលីចំពោះអ៊ុយក្រែនសរុបឈានដល់ទៅ៧៩០លាន​ដុល្លារអូស្ត្រាលី រួមទាំងជំនួយផ្នែកយោធាចំនួន៦១០លានដុល្លារអូស្ត្រាលី ចាប់តាំងពីជម្លោះ​បាន​ចាប់​ផ្តើមនៅក្នុងខែកុម្ភៈឆ្នាំ២០២២។

 

«ការគាំទ្របន្ថែមនេះនឹងធ្វើឱ្យមានភាពខុសប្លែកគ្នាយ៉ាងពិតប្រាកដដោយជួយប្រជាជនអ៊ុយក្រែន​ដែលបន្តបង្ហាញភាពក្លាហានដ៏អស្ចារ្យក្នុងការប្រឈមមុខនឹងសង្រ្គាមខុសច្បាប់របស់រុស្ស៊ី»។ លោក អាន់តូនី អាល់បានីស និយាយបែបនេះនៅក្នុងសន្និសីទសារព័ត៌មានមួយនៅទីក្រុងកង់បេរ៉ា។

 

បើតាមប្រមុខរដ្ឋាភិបាលអូស្ត្រាលី  កញ្ចប់នេះមិនត្រូវបានជំរុញដោយ​ព្រឹត្តិការណ៍​នៅក្នុង​រុស្ស៊ីកា​ល​ពី​ចុងសប្តាហ៍មុននៅពេលដែលទាហានស៊ីឈ្នួលរុស្ស៊ីប្រដាប់ដោយអាវុធធុនធ្ងន់បានកាន់កាប់ទីក្រុង Rostov ក្នុងរយៈពេលខ្លីឡើយ។ កញ្ចប់ជំនួយយោធាចុងក្រោយបង្អស់នេះផងដែរនឹងរួមបញ្ចូលរថ ពាសដែក M113 ចំនួន២៨គ្រឿង រថយន្តប្រតិបត្តិការពិសេសចំនួន១៤គ្រឿង រថយន្តដឹកទំនិញ​ធុន​មធ្យមចំនួន២៨គ្រឿង និងរថយន្តសណ្ដោង១៤គ្រឿង។

 

​​បន្ថែមពីនេះ លោក អាល់បានីស បាននិយាយថា រដ្ឋាភិបាលស្វាគមន៍ចំពោះការសម្រេចចិត្ត​របស់​តុលាការជាន់ខ្ពស់អូស្ត្រាលីក្នុងរារាំងរុស្ស៊ីសាងសង់ស្ថានទូតថ្មីនៅជិតសភាក្នុងទីក្រុងកង់បេរ៉ា។

 

អូស្ត្រាលី ជាប្រទេសមួយក្នុងចំណោមប្រទេសផ្គត់ផ្គង់ជំនួយយោធាធំបំផុតមួយសម្រាប់អ៊ុយក្រែន ទោះមិនមែនជាសមាជិកសម្ព័ន្ធយោធាណាតូ ហើយបានផ្គត់ផ្គង់ជំនួយនានា គ្រាប់រំសេវ ឧបករណ៍កា​រ​ពាររួមទាំងរថពាសដែក Bushmaster ជាច្រើនគ្រឿងផងដែរ។ អូស្ត្រាលីបាន​ហាម​ឃាត់​ការ​នាំ​ចេញ​រ៉ែអាលុយមីញ៉ូម និងអាលុយ មីញ៉ូមរួមទាំងសារធាតុបុកស៊ីតទៅកាន់រុស្ស៊ី ហើយបានដាក់​ទណ្ឌកម្ម​បុគ្គល និង អង្គភាពរុស្ស៊ីប្រហែល១ពាន់នាក់៕