សៀមរាប៖ តាមរយៈសារលើទំព័រហ្វេសប៊ុករបស់ខ្លួន កាលពីថ្ងៃទី៣០ ខែមិថុនា ឆ្នាំ២០២៣ អាជ្ញាធរជាតិអប្សរា អំពាវនាវឱ្យប្រជាពលរដ្ឋ ដែលទៅលេងកម្សាន្តនៅបារាយទឹកថ្លា ឬបារាយខាងលិច ចូលរួមថែរក្សាបរិស្ថានទាំងអស់គ្នា ដោយទុកដាក់សំរាមគ្រប់ប្រភេទឱ្យបានត្រឹមត្រូវ ចៀសវាងចោលសំរាមផ្តេសផ្តាស ពាសវាលពាសកាល ដូចជា ក្នុងទឹក លើដី និងតាមគុម្ពព្រៃជាដើម។  

 

អាជ្ញាធរជាតិអប្សរា បន្ថែមទៀតថា ថង់ប្លាស្ទិក ឬដបភេសជ្ជៈទាំងអស់ ដែលប្រើប្រាស់រួចត្រូវវេចខ្ចប់ទុកដាក់ឱ្យបានត្រឹមត្រូវ និងចោលនៅក្នុងធុងសំរាម ទើបជាការថែរក្សាបរិស្ថានបានស្អាតជានិច្ច។ អាជ្ញាធរជាតិអប្សរា បន្តថា ការលើកតម្លៃ តាមរយៈការចូលរួមថែរក្សាបរិស្ថាននៅរមណីយដ្ឋានអង្គរជារឿងប្រសើរបំផុត។ 

 

អាជ្ញាធរជា​តិអប្សរា បន្ថែមថា លើកពាក្យស្លោកថា «ទុកដាក់សំរាមបានត្រឹមត្រូវ គឺជាការរួមចំណែកថែរក្សាបរិស្ថានក្នុងរមណីយដ្ឋានអង្គរ»៕