អន្តរជាតិ
ចិន ថ្កោលទោសការអធិប្បាយរបស់អាម៉េរិកនិងអង់គ្លេសលើច្បាប់សន្តិសុខជាតិរបស់ខ្លួន
× ការិយាល័យស្នងការនៃក្រសួងការបរទេសចិននៅតំបន់រដ្ឋបាលពិសេសហុងកុង (HKSAR) នាថ្ងៃទី៣០ ខែមិថុនា បានថ្កោលទោសការអត្ថាធិប្បាយរបស់អាម៉េរិក និងអង់គ្លេសជុំវិញច្បាប់សន្តិសុខជាតិរបស់ខ្លួន។ ចិនបញ្ជាក់ជាថ្មីថា ច្បាប់នេះបានជួយហុងកុងឱ្យស្ថិរភាព និងវិបុលភាព ដោយចាកចេញពីភាពវឹកវរ ហើយប្រទេសផ្សេងទៀតមិនគួរជ្រៀតជ្រែកចូលក្នុងកិច្ចការក្នុងស្រុករបស់ចិនឡើយ។
អាម៉េរិក និងអង់គ្លេស បានចេញសេចក្តីថ្លែងការណ៍ជុំវិញច្បាប់សន្តិសុខរបស់ចិននៅហុងកុងនៅប៉ុន្មានថ្ងៃមកនេះ ហើយស្ថាប័នសភាប្រទេសទាំង២ ថែមទាំងជជែកពីរឿងនេះថែមទៀត ស្របពេលឆ្នាំនេះជាខួបលើកទី២៦នៃការវិលត្រឡប់នៃទឹកដីហុងកុង និងខួបលើកទី៣ នៃការអនុវត្តច្បាប់សន្តិសុខជាតិ។
ចិនមិនសប្បាយចិត្តឡើយនឹងការលូកលាន់បែបនេះ។ ការិយាល័យស្នងការក្រសួងការបរទេសចិននៅហុងកុងនិយាយថា ចាប់តាំងពីការអនុវត្តច្បាប់សន្តិសុខជាតិមក នីតិរដ្ឋ និងបរិយាកាសធុរកិច្ចរបស់ហុងកុងមានភាពប្រសើរឡើង ហើយសង្គមកាន់តែមានស្ថិរភាព និងឯកភាពគ្នា។
«ការពិតបានបង្ហាញឱ្យឃើញថា ច្បាប់សន្តិសុខជាតិ ជាមូលដ្ឋានគ្រឹះនៃសន្តិសុខរបស់ហុងកុង និងជាអាណាព្យាបាលនៃភាពរុងរឿង និងស្ថិរភាពរបស់ខ្លួន»។ មន្ត្រីចិនបានលើកឡើងបែបនេះ រួចសង្កត់ធ្ងន់ថា ហុងកុងគឺជាសង្គមដែលមានច្បាប់ ហើយឧក្រិដ្ឋជនដូចជា Jimmy Lai ត្រូវបានចាប់ខ្លួន និងកាត់ទោសតាមច្បាប់ដែលត្រឹមត្រូវ។
ទន្ទឹមនឹងនេះ ចិនបញ្ជាក់ឡើងវិញថា កម្លាំងខាងក្រៅគ្មានសិទ្ធិចង្អុលបង្ហាញឱ្យចិនធ្វើតាមនោះឡើយ ហើយរដ្ឋាភិបាលចិនប្តេជ្ញាការពារអធិបតេយ្យភាពជាតិ សន្តិសុខ និងផលប្រយោជន៍អភិវឌ្ឍន៍របស់ខ្លួន។ ចិនក៏ជំរុញឱ្យអាម៉េរិក និងអង់គ្លេសបញ្ឈប់ការជ្រៀតជ្រែកក្នុងកិច្ចការផ្ទៃក្នុងរបស់ខ្លួន៕
Tag:
(ចិន
អាម៉េរិក
អង់គ្លេស)
© រក្សាសិទ្ធិដោយ thmeythmey.com