អន្តរជាតិ
នាយករដ្ឋមន្ត្រីឥណ្ឌា គាំទ្រចំណាត់ការរុស្ស៊ីចំពោះការបះបោរក្រុមទាហានស៊ីឈ្នួល Wagner
× ប្រធានាធិបតីរុស្ស៊ី វ្ល៉ាឌីមៀ ពូទីននាថ្ងៃទី៣០ ខែមិថុនាបានជជែកជាមួយនាយករដ្ឋមន្ត្រីឥណ្ឌា នារិន្ទ្រា ម៉ូឌី តាមទូរស័ព្ទជុំវិញស្ថានភាពនៅអ៊ុយក្រែន និងរបៀបដែលក្រុងមូស្គូបានដោះស្រាយការបះបោររបស់ក្រុមទាហានស៊ីឈ្នួលរុស្ស៊ី Wagner។
បើតាមការប្រកាសរបស់ទីក្រុងមូស្កូ លោក ម៉ូឌី បានសម្តែងការគាំទ្រចំពោះការដោះស្រាយការបះបោរដោយក្រុមទាហានស៊ីឈ្នួល Wagner កាលពីសប្តាហ៍មុន។ ឯរដ្ឋាភិបាលឥណ្ឌាបាននិយាយថា លោក ពូទីន ក៏បានប្រាប់នាយករដ្ឋមន្រ្តីអំពីការវិវត្តថ្មីៗនៅរុស្ស៊ីក្នុងអំឡុងកិច្ចសន្ទនានេះផងដែរ។
«ខណៈដែលកំពុងពិភាក្សាអំពីស្ថានភាពនៅអ៊ុយក្រែន នាយករដ្ឋមន្ត្រី ម៉ូឌី បានរំលឹកឡើងវិញនូវការអំពាវនាវរបស់លោកឱ្យមានការសន្ទនា និងការពិភាក្សាការទូតរវាងភាគីពាក់ព័ន្ធ»។ ក្រុងញូវដែលីបញ្ជាក់ក្នុងសេចក្តីថ្លែងការណ៍មួយបែបនេះ។
ប្រភពសន្តិសុខឥណ្ឌាសម្គាល់ថា ទីប្រឹក្សាសន្តិសុខជាតិឥណ្ឌា Ajit Doval ក៏បានជជែកជាមួយសមភាគី លោក Nikolai Patrushev នាថ្ងៃទី២៧ ខែមិថុនាលើបញ្ហាបះបោរផងដែរ។
គួរបញ្ជាក់ថា ក្រុមទាហានស៊ីឈ្នួល Wagner ដែលគ្រប់គ្រងដោយលោក Yevgeny Prigozhin បានដឹកនាំការបះបោរមួយដើម្បីស្វែងរកសន្តិសុខ និងសុវត្ថិភាពសម្រាប់ក្រុមខ្លួន ហើយបានដង្ហែក្បួនជិតដល់ក្រុងមូស្គូ។ ប៉ុន្តែការបះបោរបានបញ្ចប់ ដោយលោក Prigozhin ទៅស្នាក់នៅឯបេឡារុសដែលបានធានាសុវត្ថិភាព៕
© រក្សាសិទ្ធិដោយ thmeythmey.com