បើតាមរបាយការណ៍របស់អាជ្ញាធរជាតិអប្សរា ពិព័រណ៍នេះ នឹងរៀបចំតាំងបង្ហាញនូវវត្ថុបុរាណ និងវត្ថុសិល្បៈ ចាប់ពីថ្ងទី១ ខែកក្កដា ឆ្នាំ២០២៣ រហូតដល់ថ្ងៃទី៣១ ខែមិថុនា ឆ្នាំ២០២៤។ លោក ភួយ សាវឿត នាយកស្តីទីនៃសារមន្ទីរព្រះនរោត្តមសីហនុ-អង្គរ បានបញ្ជាក់ថា វត្ថុសិល្បៈដែលទទួលពីពលរដ្ឋ នឹងត្រូវយកមកថែរក្សា និងអភិរក្ស។ 
 

ពិព័រណ៍នេះ  នឹងតាំងបង្ហាញកុលាលភាជន៍ចំនួន១៦ប្រភេទ ដែលជាប្រភេទកុលាលភាជន៍រឹង មានស្រទាប់រលោងពណ៌ត្នោត និងពណ៌បៃតង។ ក្នុងនោះដែរ កុលាលភាជន៍ទាំងនេះ ត្រូវបានយកទៅដុតក្នុងឡកម្តៅចន្លោះពី១ ០០០ ទៅ១ ២០០អង្សាសេ។ ជាមួយគ្នានេះ កុលាលភាជន៍ទាំង១៦ ដែលនឹងយកមកដាក់តាំងបង្ហាញបានមកពីពលរដ្ឋចំនួន៨ភូមិ ក្នុងខេត្តសៀមរាប។ នេះជាការបញ្ជាក់បន្ថែមរបស់លោក ភួយ សាវឿត។ 
 

ក្រៅពីកុលាលភាជន៍ និងវត្ថុសិល្បៈ ក៏មានវត្ថុមួយចំនួនស្ថិតនៅសម័យបុរេប្រវត្តិសាស្ត្រជាវត្ថុសក្ការសម្រាប់បញ្ចុះនៅតាមប្រាសាទ រួមទាំងវត្ថុសិល្បៈបានពីវត្តអារញ្ញរង្សី នឹងយកមកបង្ហាញផងដែរ។ ទន្ទឹមនឹងនោះ សម្រាប់សាធារណជន សិស្សានុសិស្ស និសិ្សត និងអ្នកស្រាវជ្រាវទាំងអស់ អាចមកទស្សនាស្វែងយល់ក្នុងការតាំងពិព័រណ៍ចាប់ផ្តើមពីថ្ងៃទី០១ ខែកក្កដា ឆ្នាំ២០២៣ខាងមុខនេះតទៅ។
 

សូមជម្រាបថា សារមន្ទីរព្រះនរោត្តមសីហនុ-អង្គរ បានបើកដំណើរការជាផ្លូវការតាំងពីឆ្នាំ២០០៨មក ដោយមានថែរក្សា និងអភិរក្សវត្ថុសិល្បៈពីបុរាណជាច្រើន បានមកពីការធ្វើកំណាយស្រាវជ្រាវនានា។ សារមន្ទីរមានទីតាំងស្ថិតនៅភូមិបឹងដូនប៉ា សង្កាត់ស្លក្រាម ក្រុងសៀមរាប៕