អន្តរជាតិ
លោកស្រី ស៊ូជី ស្នើសុំកាត់បន្ថយឆ្នាំជាប់ពន្ធនាគារក្នុងការបើកសវនាការតុលាការកំពូល
×
តុលាការកំពូលមីយ៉ាន់ម៉ា នាថ្ងៃទី៥ ខែកក្កដា បានបើកសវនាការជាលើកដំបូងនៅក្នុងបណ្តឹងប្រឆាំងការសម្រេចរបស់តុលាកាថ្នាក់ក្រោមពីសំណាក់លោកស្រី អ៊ុងសាន ស៊ូជី ។ លោកស្រី ស៊ូជី ព្យាយាម កាត់បន្ថយការជាប់ពន្ធនាគាររយៈពេល៣៣ឆ្នាំ។
លោកស្រី អ៊ុងសាន ស៊ូជី ត្រូវបានកាត់ទោសពីការញុះញង់ និងការក្លែងបន្លំការបោះឆ្នោត និងរួមទាំងអំពើពុករលួយចាប់តាំងពីក្រុមយោធាបានចាប់ខ្លួនលោកស្រីអំឡុងរដ្ឋប្រហារខែកុម្ភៈ ឆ្នាំ២០២១ ប្រឆាំងនឹងរដ្ឋាភិបាលជាប់ឆ្នោតរបស់លោក។ លោកស្រីកំពុងត្រូវឃុំខ្លួននៅក្នុងពន្ធនាគារក្នុងទីក្រុងណៃពិដោ។
របបយោធាក៏បានដាក់បញ្ជាឱ្យមេធាវីរបស់លោកស្រីឈប់និយាយជាមួយប្រព័ន្ធផ្សព្វផ្សាយ ឬអង្គការបរទេសអំពីករណីនេះ ហើយមេធាវីរូបនោះមិនអាចជួបលោកស្រីបានឡើយចាប់តាំងពីថ្ងៃទី៣០ ខែធ្នូ ឆ្នាំ២០២២ មកម្ល៉េះ។
ក្នុងការបើកសវនាការលើកដំបូងរបសតុលាការកំពូលលើបណ្ដឹងសារទុក្ខនាថ្ងៃទី៥ ខែកក្កដា តំណាង របស់លោកស្រី ស៊ូជី បានវែកញែកអំពីការផ្តន្ទាទោសលោកស្រីពីបទរំលោភច្បាប់សម្ងាត់រដ្ឋ និងការក្លែងបន្លំការបោះឆ្នោត ហើយបានស្នើឱ្យមានការកាត់បន្ថយឆ្នាំជាប់ទោសផងដែរ។ លោកស្រី ស៊ូជី មិនមានវត្តមាននៅទីនោះឡើយ។
តុលាការកំពូលមីយ៉ាន់ម៉ាត្រូវបានរំពឹងថានឹងចំណាយពេលដល់ទៅពីរខែដើម្បីចេញសេចក្តីសម្រេចរបស់ខ្លួន។
ក្រោយរដ្ឋប្រហារឆ្នាំ២០២១ មីយ៉ាន់ម៉ាធ្លាក់ចូលទៅក្នុងភាពវឹកវរផ្នែកនយោបាយ និងសង្គមដោយរបបយោធារងការថ្កោលទោសជាសាកលចំពោះការបង្រ្កាបយ៉ាងហិង្សា។ តុលាការកំពូលនឹងបើកសវនាការលើបណ្តឹងឧទ្ធរណ៍របស់លោកស្រីស៊ូជីជុំវុញការផ្តន្ទាទោសពីបទប្រើប្រាស់ថវិការដ្ឋមិនត្រឹមត្រូវ និងការរំលោភច្បាប់ពាណិជ្ជកម្ម និងទូរគមនាគមន៍ក្នុងរយៈពេលពីរសប្តាហ៍ខាងមុខ៕
© រក្សាសិទ្ធិដោយ thmeythmey.com