ជាតិ
អាជ្ញាធរកម្ពុជា ចាប់បានទារស់ ៦ពាន់ក្បាលទៀត នាំចូលគ្មានច្បាប់ពីវៀតណាម រូបភាព៖ លោក ហ៊ុន សារ៉ាត់
× ភ្នំពេញ៖ ដើមខែកក្កដានេះ អាជ្ញាធរកម្ពុជាបង្រ្កាបបានសត្វទារស់២ករណី ក្នុងចំនួន៦ពាន់ក្បាល ដែលដឹកតាមឡានចេញពីប្រទេសវៀតណាម ចូលមកកម្ពុជាដោយគ្មានច្បាប់អនុញ្ញាត។
នាព្រឹកថ្ងៃទី ៦ កក្កដានេះ ក្រុមការងារអន្តរាគមន៍បង្ក្រាបបទល្មើសចលនាសត្វ នៃអគ្គនាយកដ្ឋានសុខភាពសត្វនិ ងផលិតកម្មសត្វ សហការជាមួយការិយាល័យផលិតកម្ម និងបសុព្យាបាលនៃមន្ទីរកសិកម្មខេត្តព្រៃវែង ចុះឃាត់រថយន្តដឹកសត្វទារស់បានចំនួន២ករណី ដែលលួចនាំចូលពីវៀតណាមមកកម្ពុជាតាមច្រកខេត្តព្រៃវែង ដោយគ្មានច្បាប់។ នេះបើតាមការបញ្ជាក់របស់លោក ហ៊ុន សារ៉ាត់ អនុប្រធានអគ្គនាយកដ្ឋានសុខភាពសត្វ និងផលិតកម្មសត្វ។
ករណីទី១ មន្រ្តីជំនាញឃាត់បានរថយន្តមួយគ្រឿងម៉ាក HYUNDAI ជាប្រភេទរថយន្តដឹកទំនិញចំណុះ ២តោនកន្លះ ដឹកសត្វទារស់ចំនួន ៣ពាន់ក្បាលចេញពីវៀតណាម ចូលមកកម្ពុជាតាមច្រកបន្ទាយចក្រី ស្រុកព្រះស្ដេច ខេត្តព្រែវែង។ រថយន្តនេះ ដឹកសត្វទាដោយគ្មានលិខិតអនុញ្ញាតអ្វីទាំងអស់ និងមានបំណងទៅលក់ចែកចាយនៅខេត្តបន្ទាយមានជ័យ។
ដូចករណីទី១ដែរ អាជ្ញាធរបន្តចាប់បានរថយន្តមួយគ្រឿងទៀត ម៉ាក HYUNDAI ចំណុះ ២តោនកន្លះ ដឹកទារស់ចំនួន ៣ពាន់ក្បាលពីវៀតណាម ចូលមកកម្ពុជាតាមច្រករបៀង ស្រុកព្រះស្ដេច ខេត្តព្រៃវែង ឆ្ពោះទៅលក់ចែកចាយនៅខេត្តកណ្ដាល។ វត្ថុតាងនៃបទល្មើសទាំងនោះ ត្រូវបានយកទៅរក្សាទុកនៅទីតាំងចត្តាឡីស័កសត្វរបស់អគ្គនាយកដ្ឋានសុខភាពសត្វ និងផលិតកម្មសត្វ ដើម្បីអនុវត្តតាមនីតិវិធីច្បាប់៕
Tag:
កសិកម្ម
បទល្មើសចលនាសត្វ
អគ្គនាយកដ្ឋានសុខភាពសត្វ
© រក្សាសិទ្ធិដោយ thmeythmey.com