ជុំវិញបញ្ហានេះ លោក វ៉ី សំណាង អភិបាលខេត្តកំពង់ស្ពឺ បានណែនាំដល់ពលរដ្ឋ ជាពិសេសកសិករទូទាំងខេត្តឱ្យតាមដានការប្រែប្រួលអាកាសធាតុជាប្រចាំ ដើម្បីត្រៀមទប់ទល់គ្រោះទឹកជំនន់ និងបញ្ហារាំងស្ងួត ដែលមិនមានភាពទៀងទាត់។
 

លោក ប្រាប់សារព័ត៌មាន Thmey Thmey 25 នៅថ្ងៃទី៧ កក្កដានេះថា បច្ចុប្បន្នកម្ពុជាមានភ្លៀងធ្លាក់ច្រើន ជាពិសេសក្នុងភូមិសាស្រ្តភ្នំពេញ និងកំពង់ស្ពឺ។ ការណ៍នេះ បានបណ្ដាលឱ្យមា​នទឹកជន់លិចផ្ទះសំបែង និងស្រែចម្ការមួយចំនួនរបស់ពលរដ្ឋ។ អភិបាលខេត្ត​កំពង់ស្ពឺ បន្តថា មូលហេតុដែលនាំឱ្យកើតទឹកជំនន់ដោយសារតែការរីកចម្រើននៃទីក្រុង ក៏ដូចជាការចាក់សាប ដែលធ្វើឱ្យទឹកមិនសូវជ្រាបបានលឿន។
 

ស្ថានភាពបែបនេះ ប្រសិនបើគ្មានការតាមដានការប្រែប្រួលអាកាសធាតុ ឬជំនន់ទឹកភ្លៀងនោះទេ អាចនឹងធ្វើឱ្យប៉ះពាល់ដល់ពលរដ្ឋ និងផលដំណាំរបស់កសិករ ព្រោះថាភ្លៀងមិនទៀងទាត់ ជួនមានច្រើន ឬតិច។
 

លោក វ៉ី សំណាង បានអំពាវនាវឱ្យពលរដ្ឋ​ប្រញាប់រាយការណ៍មកកាន់អាជ្ញាធរដែលនៅជិតបំផុត ក្នុងករណីជន់លិចដំណាំ ឬលំនៅដ្ឋាន។ លោក មិនលើកទឹកចិត្តឱ្យមានការបង្ហោះតាមហ្វេសប៊ុកនោះទេ ព្រោះវាអាចបង្កភាពយឺតដល់ការជួយសង្រ្គោះ។
 

ដោយឡែក ជាការត្រៀមទុកសម្រាប់រដូវវស្សានេះ អាជ្ញាធរខេត្តកំពង់ស្ពឺ បានត្រៀមកម្លាំង និងកំណត់ទីទួលសុវត្ថិភាព ដើម្បីជម្លៀសពលរដ្ឋ និងជួយសង្រ្គោះស្រូវ ឬដំណាំផ្សេងៗ ក្នុងករណីមានការជន់លិចកើតឡើងនៅពេលណាមួយ។
 

«យើងបានដឹងគ្រប់គ្នាហើយ មុនថ្ងៃលិចនៅភ្នំពេញ ឃើញមានលិចនៅជប៉ុនដែរ ដោយជម្លៀសមនុស្សអស់៥ទៅ៦ម៉ឺននាក់។ ដោយសារការរីកចម្រើននៃទីក្រុង ដូចជាការចាក់សាបអីហ្នឹង វាជាបញ្ហាធ្វើឱ្យទឹកជ្រាបអត់មានលឿន។ ហើយនៅកំពង់ស្ពឺខ្ញុំ មានផ្ទៃរងទឹកភ្លៀងធំ វាក៏អាចមានការជន់លិចដូចភ្នំពេញដែរ ប្រសិនបើយើងមិនបានតាមដានការប្រែប្រួលអាកាសធាតុ ឬជំនន់ទឹកភ្លៀង វាអាចធ្វើឱ្យបងប្អូនមានបញ្ហា​ប្រឈម»។ នេះជាការ​លើក​ឡើង​របស់លោក វ៉ី សំណាង។
 

ខេត្តកំពង់ស្ពឺ មានផែនការដាំដំណាំស្រូវវស្សាមានចំនួន ១១៧.៦៥៧ហិកតា។ គិតមកទល់ពេលនេះ ការដាំដុះត្រូវបានអនុវត្ត៣៥ភាគរយហើយ ។ ដោយឡែកដំណាំរួមផ្សំធ្វើបាន៦៧៥ហិកតា៕