ជាតិ
ព័ត៍មានសុខភាព
សុខភាព
មណ្ឌលសុខភាពចំនួន៤៨ នៅកំពង់ធំ កំពុងផ្តល់ថ្នាំមីក្រូសារជាតិចម្រុះដល់ស្រ្តីមានផ្ទៃពោះ
× ភ្នំពេញ៖ អង្គការ Helen Keller ប្រចាំកម្ពុជា កំពុងសហការជាមួយក្រសួងសុខាភិបាល លើការផ្តល់បន្ថែមគ្រាប់ថ្នាំមីក្រូសារជាតិចម្រុះដល់ស្រ្តីមានផ្ទៃពោះ ឬថ្នាំ MMS (Multiple Micronutrient Supplement for pregnant women) នៅមណ្ឌលសុខភាពចំនួន៤៨ ក្នុងខេត្តកំពង់ធំ។
លោក ហ៊ូ ក្រើន នាយកអង្គការ Helen Keller ប្រចាំកម្ពុជា បានលើកឡើងថា MMS ជាថ្នាំគ្រាប់មីក្រូសារជាតិចម្រុះ ដែលផ្ដល់សារធាតុចិញ្ចឹមជាច្រើន ទៅទារក និងម្ដាយរហូតដល់ ១៥មុខ និងជួយមិនឱ្យមានបញ្ហាទារកស្លាប់ក្នុងផ្ទៃ ទារកកើតមិនគ្រប់គីឡូ ទារកក្នុងផ្ទៃមិនឡើងទម្ងន់ និងទារកកើតមិនគ្រប់ខែជាដើម។ លោក ហ៊ូ ក្រើន បញ្ជាក់បែបនេះ ក្នុងទស្សនកិច្ចស្វែងយល់ គម្រោងការផ្តល់បន្ថែមគ្រាប់ថ្នាំមីក្រូសារជាតិចម្រុះដល់ស្រ្តីមានផ្ទៃពោះ នៅមណ្ឌលសុខភាពជ័យ ដែលស្ថិតក្នុងភូមិល្វា ឃុំល្វា ស្រុកកំពង់ស្វាយ ខេត្តកំពង់ធំ នាពេលកន្លងទៅ។
បើតាម លោក ហ៊ូ ក្រើន ការសិក្សាបានរកឃើញថា អត្រាស្លាប់របស់ស្រ្តីមានផ្ទៃពោះត្រូវបានកាត់បន្ថយ ហើយជួយកាត់បន្ថយនិងការពារស្រ្តីមានផ្ទៃពោះដែលមានបញ្ហាស្លេកស្លាំងស្រាប់ ពីហានិភ័យសម្រាលកូនមុនពេលគ្រប់ខែ សម្រាលកូនមិនគ្រប់គីឡូ និងបញ្ហាមិនឡើងទម្ងន់របស់ម្តាយក្នុងអំឡុងពេលមានផ្ទៃពោះ។«ក្រសួងសុខាភិបាល និងអង្គការ Helen Keller កំពុងសិក្សាលើថ្នាំ MMS មិនទាន់អនុញ្ញាតចែកចាយទូទាំងប្រទេសទេ។ គ្រាន់តែសិក្សា នៅមណ្ឌលសុខភាព៤៨ ក្នុងខេត្តកំពង់ធំ។ ស្រ្តីមានផ្ទៃពោះ លេបថ្នាំនេះ ១គ្រាប់ក្នុង១ថ្ងៃ។ តាមបទពិសោធន៍របស់ស្រ្តីមានផ្ទៃពោះ ដែលបានលេបថ្នាំនេះ មិនមានអាការអ្វីកើតឡើងទេ ពោលគឺស្រួលជាងថ្នាំជាតិដែក»។
ថ្នាំ MMS នេះ ត្រូវបានដាក់ឱ្យប្រើប្រាស់ នៅមណ្ឌលសុខភាពជ័យ នៃភូមិល្វា ឃុំល្វា ស្រុកកំពង់ស្វាយ ខេត្តកំពង់ធំ តាំងពីដើមខែមីនា ឆ្នាំ២០២៣មក។ អ្នកនាង សុន ផានី ពេទ្យឆ្មបនៅមណ្ឌលសុខភាពជ័យ បានលើកឡើងពីអត្ថប្រយោជន៍របស់ថ្នាំមីក្រូសារធាតុចម្រុះថា វាជួយកាត់បន្ថយភាពស្លេកស្លាំង ខ្វាក់មាន់ និងរោគសញ្ញាផ្សេងៗទៀត ដែលកើតឡើងដោយសារកង្វះវីតាមីន និងសារធាតុរ៉ែ។ ថ្នាំនេះ ក៏ល្អជាងថ្នាំជាតិដែក ព្រោះវាមានសារធាតុចិញ្ចឹមរហូតដល់ ១៥មុខ។
យ៉ាងណាក៏ដោយ ថ្នាំនេះក៏មានចំណុចល្អ និងមិនសូវល្អខ្លះដែរ។ «ថ្នាំMMS ធ្វើឱ្យស្រ្តីខ្លះគាត់ពិបាកហូប ដោយក្លិនរបស់វា។ ហូបទៅមានអាការធ្វើទុក្ខក្នុងខ្លួនតិចតួច តែវាក៏បានជួយឱ្យស្រ្តីបាត់ចាញ់កូន និងមានសារធាតុចិញ្ចឹមច្រើន»។ ពេទ្យឆ្មប សុន ផានី បញ្ជាក់ដូច្នេះ។
ដោយសារតែថ្នាំនេះ ស្ថិតក្នុងដំណាក់កាលសិក្សា ស្ត្រីមានផ្ទៃពោះដែលអាចប្រើប្រាស់ថ្នាំនេះ ក៏ត្រូវបានកំណត់លក្ខខណ្ឌមួយចំនួន ដើម្បីជួយដល់ដំណើរការនៃការសាកល្បងនេះដែរ។ បើតាមអ្នកគ្រូពេទ្យ សុន ផានី ស្ត្រីដែលអាចប្រើថ្នាំនេះ ត្រូវមានអាយុ ពី១៨ឆ្នាំ ដល់៤៥ឆ្នាំ និងមានផ្ទៃពោះមិនឱ្យលើស១៤សប្ដាហ៍ ព្រមទាំងមានសុខភាពល្អអំឡុងពេលពពោះ។ ស្ត្រីទាំងនោះ ក៏គ្មានគម្រោងប្ដូរទីលំនៅរយៈពេល៦ខែបន្ទាប់ ចេញពីខេត្តកំពង់ធំដែលជាតំបន់គោលដៅ។ ពួកគេ មិនមែនជាអ្នកដែលកំពុងសាកល្បងអាហារូបត្ថម្ភថ្មីរបស់រដ្ឋាភិបាល ដែលពុំទាន់មានការតាមដាន និងថែទាំ ហើយក៏ត្រូវផ្តល់ទិន្នន័យពាក់ព័ន្ធនានា និងទទួលការតាមដានសុខភាពជារៀងរាល់ខែដែរ។
អ្នកស្រី ឈុំ សម្បត្តិ ជាស្ត្រីមានផ្ទៃពោះម្នាក់ ដែលកំពុងប្រើប្រាស់ថ្នាំ MMS នេះ។ រស់នៅភូមិបោះវែង ឃុំសាលាសៅ ស្រុកប្រាសាទបល្ហ័ង្គ ខេត្តកំពង់ធំ អ្នកស្រី ឈុំ សម្បត្តិ ដែលកំពុងមានទម្ងន់៧ខែ លើកឡើងថា ថ្នាំMMS ជួយជំនួយកម្លាំង ជំនួយគ្រាប់ឈាម និងជួយបន្ថយការចាញ់កូន។ ថ្នាំនេះ ក៏មិនបានធ្វើឱ្យស្ត្រីរូបនេះ មានអាការធ្វើទុក្ខអ្វីដែរ។
អ្នកស្រី ឈុំ សម្បត្តិ អះអាងថា ខ្លួនប្រើប្រាស់ថ្នាំMMSនេះ ក៏ផ្អែកលើយោបល់ពីគ្រូពេទ្យនៅមណ្ឌលសុខភាពដែលខ្លួនទៅទទួលសេវាដែរ ខណៈដែលកាលពីអ្នកស្រី មានកូនទី១ នោះ គឺអ្នកស្រីបានប្រើប្រាស់ថ្នាំជាតិដែក។ ស្ត្រីរូបនេះ បន្ថែមការប្រៀបធៀបរបស់ខ្លួន រវាងការប្រើប្រាស់ថ្នាំជាតិដែក និងថ្នាំ MMS អំឡុងពេលពពោះ យ៉ាងដូច្នេះថា៖«ថ្នាំជាតិដែក ជួយជំនួយដល់គភ៌ក្នុងផ្ទៃដែរ គ្រាន់តែគ្រាប់ឈាមក្រហមខ្សោយ។ ខ្ញុំទៅពិនិត្យបានតែ ៨-៩ទេ។ ពេលខ្ញុំប្រើថ្នាំ MMS គ្រាប់ឈាមក្រហមខ្ញុំ បានគ្រប់១០-១១។ ថ្នាំរក្សាគភ៌ MMS ជំនួយមិនឱ្យខ្ញុំអស់កម្លាំង។ បើថ្នាំជាតិដែកលេបហើយអស់កម្លាំងចង់តែគេង។ ថ្នាំជាតិដែកពេលលេបនៅមានក្លិនឆ្អាប តែថ្នាំរក្សាគភ៌ MMS ស្រួលហូបមិនសូវមានក្លិននោះទេ»។
ជុំវិញការសាកល្បងថ្នាំ MMS ជំនួសថ្នាំជាតិដែក សម្រាប់ស្ត្រីមានផ្ទៃពោះនេះ សារព័ត៌មានថ្មីៗ មិនអាចសុំការអធិប្បាយបន្ថែមពី អ្នកស្រី ឱ វណ្ណឌីន អ្នកនាំពាក្យក្រសួងសុខាភិបាលបានទេ ដោយទូរសព្ទចូលតែមិនមានការឆ្លើយតប៕
Tag:
ថ្នាំMMS
មណ្ឌលសុខភាព
ស្ត្រីមានផ្ទៃពោះ
ថ្នាំជាតិដែក
© រក្សាសិទ្ធិដោយ thmeythmey.com