អន្តរជាតិ
ICC បើកផ្លូវឱ្យស៊ើបអង្កេតលើការសម្លាប់ក្នុងសង្រ្គាមគ្រឿងញៀននៅហ្វីលីពីនឡើងវិញ
× ចៅក្រមសាលាឧទ្ធរណ៍នៅតុលាការឧក្រិដ្ឋកម្មអន្តរជាតិ (ICC) បានជម្រះផ្លូវសម្រាប់ការស៊ើបអង្កេតលើការសម្លាប់មនុស្សរាប់ពាន់នាក់ក្នុងអំឡុងសង្រ្គាមគ្រឿងញៀននៅហ្វីលីពីនក្រោមអាណត្តិលោក រ៉ូឌ្រីហ្គោ ឌូទើតេ ។ ក្រុមជនរងគ្រោះ បានសាទរការសម្រេចរបស់ ICC ជាជំហានមួយទៀតឆ្ពោះទៅរកយុត្តិធម៌សម្រាប់អ្នកដែលត្រូវបានសម្លាប់។
នៅក្នុងសេចក្តីសម្រេចនាថ្ងៃទី១៨ ខែកក្កដា ចៅក្រមសាលាឧទ្ធរណ៍របស់ ICC បានច្រានចោលការ ប៉ុនប៉ងរបស់ហ្វីលីពីនក្នុងការរារាំងការស៊ើបអង្កេតលើយុទ្ធនាការប្រឆាំងគ្រឿងញៀនរបស់អតីតប្រធានាធិបតីហ្វីលីពីន រ៉ូឌ្រីហ្គោ ឌូទើតេ។ យ៉ាងណាមិញ តំណាងរបស់លោក ឌូទើតេ បាននិយាយថា លោកនឹងមិនអើពើនឹងការសម្រេចចិត្តនោះទេ។
ក្នុងសេចក្ដីថ្លែងការណ៍មួយ លោក Harry Roque និយាយថា ក្នុងនាមជារដ្ឋឯករាជ្យ និងអធិបតេយ្យភាព មានតែតុលាការហ្វីលីពីនប៉ុណ្ណោះដែលអាចកាត់ទោសឧក្រិដ្ឋកម្មណាមួយដែលបានប្រព្រឹត្តនៅក្នុងទឹកដីហ្វីលីពីន។
«អតីតប្រធានាធិបតីនឹងប្រឈមមុខនឹងអ្នកចោទប្រកាន់របស់លោកគ្រប់ពេលវេលា ប៉ុន្តែនៅចំពោះមុខតុលាការហ្វីលីពីន និងចំពោះមុខចៅក្រមហ្វីលីពីនតែប៉ុណ្ណោះ»។ លោក Roque សង្កត់ធ្ងន់បែបនេះ។
កាលពីខែកញ្ញា ឆ្នាំ២០២១ ICC បានអនុម័តការស៊ើបអង្កេតជាផ្លូវការលើឧក្រិដ្ឋកម្មប្រឆាំងមនុស្សជាតិនៅហ្វីលីពីន ប៉ុន្តែបានផ្អាកការស៊ើបអង្កេតរបស់ខ្លួននៅក្នុងខែវិច្ឆិកា ឆ្នាំ២០២១ តាមសំណើរបស់ទីក្រុងម៉ានីល ដែលអះអាងថាខ្លួនបានស៊ើបអង្កេតដោយផ្ទាល់ផងដែរ។ ប៉ុន្តែនៅក្នុងខែមករា ឆ្នាំនេះ តុលាការ ICC អះអាងថា ខ្លួនមិនពេញចិត្តការស៊ើបអង្កេតរបស់ហ្វីលីពីនទេហើយរដ្ឋអាជ្ញា ICC សម្រេចបន្តការស៊ើបអង្កេតទៀត។ ជាការឆ្លើយតប ទីក្រុងម៉ានីលបានប្តឹងឧទ្ធរណ៍ចំពោះការសម្រេចចិត្តនេះដែលទំនងជាប៉ុនប៉ងរារាំងការស៊ើបអង្កេតបន្ថែមទៀត។
បើតាមទិន្នន័យប៉ូលិសហ្វីលីពីន ជនសង្ស័យជាង៦,២០០នាក់ ត្រូវបានសម្លាប់ក្នុងអំឡុងពេលការបង្រ្កាបដ៏ឃោរឃៅដែលបានធ្វើឡើងបន្ទាប់ពីការជាប់ឆ្នោតរបស់លោក ឌូទើតេ ក្នុងឆ្នាំ២០១៦៕
© រក្សាសិទ្ធិដោយ thmeythmey.com