លោក ឡុង ឌីម៉ង់ បានប្រាប់សារព័ត៌មានថ្មីៗ តាមទូរសព្ទថា​ ក្រោយបោះឆ្នោតរួច នៅពេលព្រឹកកាលពីម្សិលមិញ ពលរដ្ឋបានសម្រុកទៅខេត្តព្រះសីហនុតាមផ្លូវល្បឿនលឿន ដើម្បីកម្សាន្តតាមរមណីយដ្ឋាននានាក្នុងខេត្ត ។  រីឯ សណ្ឋាគារ ក៏ពេញស្ទើរតែអស់។
  

លោក ឡុង ឌីម៉ង់បានបញ្ជាក់ដូច្នេះ៖ «កាលពីម្សិលមិញ ពេលបោះឆ្នោតរួច គឺចំនួនទេសចរដែលមកលេងក្រោយការបោះឆ្នោតគឺមានប្រមាណចន្លោះពី ៣ម៉ឺនទៅ៤ម៉ឺននាក់។ ឯភ្ញៀវដែលមកភ្លាមៗ សុទ្ធតែភ្ញៀវខ្មែរ ដែលពួកគាត់បោះឆ្នោតហើយ ពួកគាត់អញ្ជើញមក»។
 

ទោះបីកាលពីម្សិលមិញ ខេត្តព្រះសីហនុ មានភ្លៀងធ្លាក់បន្តិចបន្តួចក្ដី តែទេសចរនៅតែមកលេងតាមតំបន់កម្សាន្តនានាក្នុងខេត្តជាហូរហែ។  នេះបើតាមលោក ឡុង ឌីម៉ង់ ដែលអះអាងថា ទោះចំនួនទេសចរច្រើន និងមិនសូវមានអ្នកសម្អាតច្រើនដូចថ្ងៃធម្មតាក្ដី ប៉ុន្តែគ្មានបញ្ហារឿងសំរាមឡើយ ដោយសារពលរដ្ឋមានការយល់ដឹង និងទុកដាក់សំរាមដោយខ្លួនឯងបានល្អ៕