លោក ហង្ស ពុទ្ធា បន្តថា សន្លឹកឆ្នោតមិនបានការជាង៤៤ម៉ឺនសន្លឹកនេះ ស្មើនឹងប្រមាណ៥ភាគរយនៃចំនួនសន្លឹកឆ្នោតសរុប។ បើធៀបនឹងលើកមុន ចំនួនសន្លឹកឆ្នោតមិនបានការលើកនេះ មានតិចជាង ព្រោះការបោះឆ្នោតជ្រើសតាំងតំណាងរាស្ត្រឆ្នាំ២០១៨ មានសន្លឹកឆ្នោតមិនបានការជិត ៦០ម៉ឺនសន្លឹក។
 

ក្នុងចំណោម​ប្រជាពលរដ្ឋមានឈ្មោះក្នុងបញ្ជីបោះឆ្នោតជាង៩,៧លាននាក់ មានប្រជាពលរដ្ឋជាង៨,២លាននាក់ ឬស្មើនឹងជាង៨៤ភាគរយ ដែលបានទៅបោះឆ្នោតជ្រើសតាំងតំណាងរាស្ត្រឆ្នាំ២០២៣។ ចំណែកកាលពីឆ្នាំ២០១៨ ប្រជាពលរដ្ឋជាង៨លាននាក់ បានទៅបោះឆ្នោត។ 
 

សូមបញ្ជាក់ថា ការប្រកាសលទ្ធផលបឋមនៃការបោះឆ្នោតជ្រើសតាំងតំណាងរាស្រ្តឆ្នាំ២០២៣នេះ បានឲ្យដឹងថា គណបក្ស ដែលទទួលបានសំឡេងឈានមុខគេ គឺគណបក្សប្រជាជនកម្ពុជា ហើយបន្ទាប់មក គឺ គណបក្សហ៊្វុនស៊ិនប៉ិច។ នៅថ្ងៃទី៩ ខែសីហា ឆ្នាំ២០២៣ គ.ជ.ប នឹងប្រកាសលទ្ធផលផ្លូវការ និងចំនួនអាសនៈដែលគណបក្សត្រូវទទួលបាន៕