ស្ថិតក្នុង League Cup ភាគខាងត្បូងពូលទី៣ Inter Miami ជាក្រុមឈរនៅកំពូលតារាងដោយរកបានជ័យជម្នះទាំង ២ប្រកួតក្នុងពូល ដោយបានយកឈ្នះលើក្រុម Cruz Azul ដែលជាជំនួបទី១ លទ្ធផល ១-០។ 
  

ការប្រកួតនាថ្ងៃទី២៥ ខែកក្កដា Inter Miami បន្តយកឈ្នះការប្រកួតបន្តទៀត ដោយលទ្ធផល ៤-០ លើក្រុម Atlanta United ហើយក្នុងចំណោម ៤គ្រាប់នោះ ក៏មានគ្រាប់បាល់ចំនួន ២គ្រាប់ ​ដែលរកបានដោយខ្សែប្រយុទ្ធប្រធានក្រុមថ្មីរបស់ក្រុម Lionel Messi។
 

មិនដូចការប្រកួតទី១ ដែល Messi បានផ្តូរចូលលេងនៅដើមវគ្គទីពីរ ប៉ុន្តែការប្រកួតជាមួយជ័យជម្នះដ៏ធំលើកនេះ ប្រធានក្រុមសញ្ជាតិអាហ្សង់ទីនបានចូលលេងតាំងពីវគ្គទីមួយតែម្តង។ ២គ្រាប់របស់ Messi ដោយគ្រាប់ដំបូងកើតឡើងនៅនាទី៨ ដោយគ្រាប់បាល់នោះជាការបង្កើតឱកាសពីសំណាក់អតីតមិត្តរួមក្រុមនៅ Barcelona កីឡាករខ្សែបម្រើ Sergio Busquets។ 
 

គ្រាប់បាល់ទី២ របស់ Messi ធ្វើបាននៅនាទី២២ ដោយគ្រាប់បាល់នោះជាការបញ្ជូនបាល់បានយ៉ាងល្អពីសំណាក់កីឡាករមិត្តរួមក្រុម Robert Taylor ដែលជាកីឡាកររកបានគ្រាប់បាល់ ២គ្រាប់ដូច Messi ក្នុងការប្រកួតនោះដែរ។ Robert Taylor ស៊ុតចូល ២គ្រាប់នៅនាទី ៤៤ និង ៥៣។
 

ពានរង្វាន់ League Cup ដែលក្រុម Inter Miami បានប្រកួតឈ្នះ ២លើកជាប់គ្នា ហើយឆ្លងទៅកាន់វគ្គជម្រុះ ពានរង្វាន់មួយនេះគឺជាការប្រកួតប្រជែងរវាងក្រុមទាំងអស់ដែលស្ថិតក្នុងលីគបាល់ទាត់ Major League Soccer ប្រជែងជាមួយនឹងលីគបាល់ទាត់ Liga MX របស់ប្រទេសម៉ិកស៊ិក។ ការប្រកួតពានរង្វាន់ League Cup មានរចនាសម្ព័ន្ធការប្រកួតដូចទៅនឹង World Cup៕