ជាតិ
ត្រីប្រាជាង១ពាន់ក្បាលក្នុងវត្តមួយនៅខេត្តត្បូងឃ្មុំ ងាប់ដោយសារចំណីខូចគុណភាពរបស់ញាតិញោម
× ត្រីប្រាដែលព្រះសង្ឃចិញ្ចឹមក្នុងស្រះត្រីព្រៃធុតង្គ នៅវត្តចង្វាបុប្ផារាម (ហៅវត្តអូររាំងឪ) ចំនួនប្រមាណ១២០០ក្បាល ឬស្មើ៥តោន បានងាប់ជាបន្តបន្ទាប់ចាប់តាំងពីថ្ងៃទី៣១ ខែកក្កដា ដោយសារពលរដ្ឋពីខាងក្រៅ ដាក់ចំណីខូចគុណភាពឱ្យស៊ី។ នេះបើតាមដីកាបញ្ជាក់របស់ព្រះចៅអធិការវត្ត។
«ថ្ងៃដែលត្រីងាប់ហ្នឹង អាត្មាឃើញញាតិញោមមួយក្រុមមកបាចចំណីឱ្យត្រីស៊ី។ ចំណី ដែលពួកគាត់យកមកហ្នឹង សុទ្ធតែហួសថ្ងៃកំណត់ទាំងអស់! វាកើតជាបញ្ហាដល់ត្រី»។ ព្រះចៅអធិការវត្តអូររាំងឪ ព្រះនាម អ៊ិត គន្ធា បានបញ្ជាក់យ៉ាងដូច្នេះមកកាន់សារព័ត៌មានឌីជីថលថ្មីៗ។
ព្រះអង្គ បានបញ្ជាក់ថា ត្រីប្រាប្រមាណ១២០០ក្បាល ដែលមានទម្ងន់សរុប៥តោន បានងាប់ជាបន្តបន្ទាប់គ្មានសល់ ប៉ុន្តែត្រីមានស្រកាផ្សេងទៀត មិនមានបញ្ហានោះឡើយ។
ត្រីប្រាដែលងាប់ទាំងនោះ ត្រូវបានព្រះសង្ឃចិញ្ចឹមតាំងពីឆ្នាំ ២០១៥ ដើម្បីទុកសម្រាប់ពលរដ្ឋ ឬពុទ្ធបរិស័ទ កម្សាន្តលេង ដោយមកទល់ពេលនេះ ត្រីមួយក្បាលៗ មានទម្ងន់ប្រហែល៥គីឡូក្រាម។
កន្លងទៅ វត្តអូរាំងឪ ក៏ធ្លាប់បានហាមប្រាមពលរដ្ឋមិនឱ្យយកចំណីពីខាងក្រៅ ទៅដាក់ឱ្យត្រីស៊ីដែរ ប៉ុន្តែ បែរជាទទួលបានការរិះគន់ទៅវិញ។ ដោយអ្នកខ្លះថា វត្តជាកន្លែង សាធារណៈ មិនគួរត្រូវបានហាមឃាត់នោះទេ ដូច្នេះទើប ព្រះសង្ឃអនុញ្ញាតឱ្យពលរដ្ឋយកចំណីចូលដោយសេរីតែម្ដង។
ប៉ុន្តែ យ៉ាងណា ក្រោយជួបហេតុការណ៍បែបនេះ ព្រះតេជគុណ អ៊ិត គន្ធា បានអំពាវនាវសារជាថ្មីដល់ពលរដ្ឋ ឬពុទ្ធបរិស័ទ ដែលមកកម្សាន្តនៅវត្តអូររាំងឪកុំយកចំណីពីខាងក្រៅ ដែលគ្មានប្រភពច្បាស់លាស់ទៅបាច់ឱ្យត្រីស៊ី តទៅទៀត៕
Tag:
កសិកម្ម
វត្តអូរាំងឪ
ត្រីប្រា
© រក្សាសិទ្ធិដោយ thmeythmey.com