អន្តរជាតិ
នយោបាយអន្តរជាតិ
បក្សភឿថៃនឹងបង្កើតរដ្ឋាភិបាលថ្មី ដោយគ្មានបក្សឆ្ពោះទៅមុខ មេបក្សភឿថៃលោក Chonlanan Srikaew (ឆ្វេង) និងមេបក្សឆ្ពោះទៅមុខលោក Pita Limjaroenrat (ស្តាំ) ។ រូបភាព AP ។
× មេដឹកនាំបក្សភឿថៃ លោក Chonlanan Srikaew បានអះអាងថា គណបក្សភឿថៃនឹងបង្កើតសម្ព័ន្ធថ្មីមួយដោយគ្មានគណបក្សឆ្ពោះទៅមុខ។ ចំណែកគណបក្សដែលនឹងចូលរួមក្នុងក្រុមចម្រុះថ្មីនោះ នឹងត្រូវប្រកាសនៅថ្ងៃទី៣ ខែសីហា។
នៅថ្ងៃទី២ ខែសីហា ប្រមុខដឹកនាំបក្សភឿថៃលោក Chonlanan Srikaew បាននិយាយថា សម្ព័ន្ធថ្មីមួយនឹងត្រូវបង្កើតឡើង ដោយគ្មានវត្តមានបក្សឆ្ពោះទៅមុខ ហើយបក្សខ្លួននឹងស្នើលោក Srettha Thavisin ជាបេក្ខភាពនាយករដ្ឋមន្ត្រី។
លោក Chonlanan Srikaew បានលើកឡើងថា ភឿថៃនិងសម្ព័ន្ធថ្មីមិនគាំទ្រការធ្វើវិសោធនកម្មច្បាប់ប្រមាថព្រះមហាក្សត្រទេ ហើយរដ្ឋាភិបាលថ្មីនឹងជំរុញឱ្យមានការសរសេរឡើងវិញនូវធម្មនុញ្ញ ជាមួយនឹងគណៈកម្មាធិការព្រាងធម្មនុញ្ញដែលជាប់ឆ្នោត។
ជាងនេះទៅទៀត បន្ទាប់ពីធម្មនុញ្ញថ្មីចូលជាធរមាន រដ្ឋាភិបាលនឹងរំលាយសភាសម្រាប់ការបោះឆ្នោតថ្មី។ ហើយនៅក្នុងកិច្ចប្រជុំលើកដំបូងនៃគណៈរដ្ឋមន្ត្រីថ្មីនេះ រដ្ឋាភិបាលនឹងស្នើធ្វើប្រជាមតិ ដើម្បីសួរប្រជាពលរដ្ឋថាតើពួកគេចង់កែធម្មនុញ្ញឡើងវិញឬក៏អត់?
លោក Chonlanan Srikaew បានបង្ហាញទំនុកចិត្តថា គណបក្សនឹងទទួលបានសំឡេងកាន់តែច្រើនពីសមាជិកព្រឹទ្ធសភាសម្រាប់បេក្ខជននាយករដ្ឋមន្ត្រីរបស់ពួកគេ នៅពេលដែលបក្សឆ្ពោះទៅមុខមិននៅក្នុងសម្ព័ន្ធ៕
Tag:
ថៃ
Chonlanan Srikaew
បក្សភឿថៃ
Srettha Thavisin
© រក្សាសិទ្ធិដោយ thmeythmey.com