លោក លី សៀនឡុង ថ្លែងទៅកាន់សភានៅថ្ងៃទី២ ខែសីហា ជុំវិញការស៊ើបអង្កេតអំពើពុករលួយពាក់ព័ន្ធនឹងលោក Iswaran ក៏ដូចជាការលាលែងពីតំណែងរបស់សមាជិកសភាពីររូបទៀត គឺអតីតប្រធានសភាលោក Tan Chuan-Jin និង លោកស្រី Cheng Li Hui  ជុំវិញរឿងអាស្រូវផ្លូវភេទរបស់ពួកគេ។ លោកថា ការស៊ើបអង្កេតអំពើពុករលួយនៅតែបន្ត។

 

រដ្ឋមន្ត្រីដឹកជញ្ជូន S Iswaran ដែលមិនអាចបំពេញការងារររបស់ខ្លួនក្រោយត្រូវបានស៊ើបអង្កេត ក៏ត្រូវកាត់បន្ថយប្រាក់ខែ ៨៥០០ដុល្លារសិង្ហបុរី (៦៣០០ដុល្លារ) ក្នុងមួយខែ រហូតដល់មានការជូនដំណឹងបន្ថែម។

 

យ៉ាងណាមិញ ប្រាក់ដែលត្រូវបានកាត់បន្ថយនេះ ជាចំណែកតូចនៃប្រាក់ខែរបស់រដ្ឋមន្រ្តីនៅសិង្ហបុរី ដែលមានជាង១លានដុល្លារក្នុងមួយឆ្នាំ។

 

លោក លី អះអាងថា ព័ត៌មានលម្អិតជុំវិញករណីរបស់រដ្ឋមន្ត្រី Iswaran អនុវត្តជាទូទៅតាមរបៀបដែលមន្ត្រីរាជការ នឹងដោះស្រាយជាមួយមន្ត្រីជាន់ខ្ពស់ក្នុងស្ថានភាពស្រដៀងគ្នានេះ។ ប៉ុន្តែសម្រាប់បរិបទជាមួយអ្នកនយោបាយជាន់ខ្ពស់បែបនេះ គឺត្រូវមានការស៊ើបអង្កេតបែបខុសគ្នាបន្តិច។

 

លោក Iswaran មានអាយុ៦១ ឆ្នាំបានក្លាយជាសមាជិកសភាតាំងពីឆ្នាំ១៩៩៧ ត្រូវ​បាន​ចាប់​ខ្លួន​ដោយ​ការិយាល័យ​ស៊ើបអង្កេត​អំពើ​ពុករលួយ (CPIB) កាល​ពី​ថ្ងៃ​ទី​១១ ខែ​កក្កដា ។ 

ការស៊ើបអង្កេតកម្រិតមន្ត្រីជាន់ខ្ពស់ ជាភាពកម្រមួយនៅសិង្ហបុរី។ គណបក្សសកម្មភាពប្រជាជន (PAP) កំពុងកាន់អំណាចតាំងពីឆ្នាំ ១៩៥៩ តែងតែមានមោទនភាពក្នុងការផ្សព្វផ្សាយពីស្អាតស្អំរបស់ខ្លួនទៅកាន់ពិភពលោក៕