នៅថ្ងៃទី២ ខែសីហា ធនាគារកណ្តាលថៃ (BoT) បានដំឡើងអត្រាការប្រាក់របស់ខ្លួនដល់កម្រិតខ្ពស់បំផុតក្នុងរយៈពេល៩ ឆ្នាំចុងក្រោយនេះ ស្របពេលមានការព្រួយបារម្ភអំពីអតិផរណាដែលអាចកើនឡើង និងអស្ថិរភាពនយោបាយ។

 

គណៈកម្មាធិការគោលនយោបាយរូបិយវត្ថុនៃធនាគារកណ្តាលថៃ បានបោះឆ្នោតជាឯកច្ឆ័ន្ទដើម្បីដំឡើងអត្រាមូលដ្ឋានចំនួន ០,២៥ភាគរយបន្ថែមទៀត ដែលធ្វើឱ្យអត្រាការប្រាក់គោលបច្ចុប្បន្នមានរហូតដល់ ២,២៥ភាគរយ។

 

ទោះបីជាអតិផរណាបានធ្លាក់ចុះជារៀងរាល់ខែចាប់តាំងពីដើមឆ្នាំនេះ ហើយបានធ្លាក់ចុះក្រោមគោលដៅដែលធនាគារកណ្តាលថៃបានកំណត់ចន្លោះពី ១ភាគរយ ទៅ៣ភាគរយ ក្នុងរយៈពេលពីរខែកន្លងមកក៏ដោយ អ្នកបង្កើតគោលនយោបាយថៃនៅតែបង្កើនអត្រាការប្រាក់គោល ដើម្បីធានាថាអតិផរណានៅតែមានកម្រិតទាបក្នុងរយៈពេលយូរ។ 

 

បើតាមរបាយការណ៍ធនាគារកណ្តាលថៃ កំណើនសេដ្ឋកិច្ចនឹងនៅតែបន្ត ដោយសារតែការងើបឡើងវិញនៃវិស័យទេសចរណ៍ និងសន្ទុះនៃការប្រើប្រាស់ ប៉ុន្តែហានិភ័យក៏មានផងដែរ ព្រោះតែការនាំចេញថយចុះ និងអស្ថិរភាពក្នុងស្រុក។

 

នៅក្នុងសេចក្តីថ្លែងការណ៍របស់ធនាគារកណ្តាលថៃបានសង្កត់ធ្ងន់ថា អតិផរណាបានធ្លាក់ចុះដោយសារតម្លៃថាមពល ប្រាក់ឧបត្ថម្ភការរស់នៅ និងការចំណាយមូលដ្ឋានកាលពីឆ្នាំមុនស្ថិតនៅកម្រិតខ្ពស់ ប៉ុន្តែនឹងស្ទុះងើបឡើងវិញនៅឆមាសទីពីរនៃឆ្នាំនេះ ។ 

 

លើសពីនេះ ហានិភ័យនៃការកើនអតិផរណាដែលបណ្តាលមកពីតម្លៃអាហារឡើងថ្លៃ ស្របពេលមានបាតុភូត El Niño កំពុងជះឥទ្ធិពលជាបណ្តើរៗ។ 

 

មួយវិញទៀត ការនាំចេញទំនិញបានធ្លាក់ចុះក្នុងប៉ុន្មានខែថ្មីៗនេះ ជាផ្នែកមួយជំរុញពីក្រោយតម្រូវការទន់ខ្សោយរបស់ចិន ប៉ុន្តែអាចនឹងកើនឡើងក្នុងរយៈពេលដ៏ខ្លីនៅពេលដែលសេដ្ឋកិច្ចពិភពលោកមានសន្ទុះមកវិញ ។

 

នៅក្នុងខែឧសភា ធនាគារកណ្តាលថៃបានព្យាករថា អត្រាកំណើនផលិតផលក្នុងស្រុកសរុប (GDP) នឹងកើនឡើងដល់ ៣,៦ភាគរយនៅឆ្នាំនេះ និង ៣,៨ភាគរយនៅឆ្នាំក្រោយ ជាមួយនឹងសញ្ញាវិជ្ជមាននៃវិស័យទេសចរណ៍ និងសន្ទុះការប្រើប្រាស់។

 

ការព្យាករពេល​នោះ មិន​មាន​ការ​ព្រួយ​បារម្ភ​អំពី​ស្ថានការណ៍​ក្នុង​ស្រុក​ឡើយ។ ការបង្កើតរដ្ឋាភិបាលថ្មីនៅថៃ ជាធម្មតាចំណាយពេលលើសពីមួយខែ។ រហូតមកដល់បច្ចុប្បន្ន ពេលវេលាបង្កើតរដ្ឋាភិបាលថ្មីអាចយូរជាងការបោះឆ្នោតជាតិកាលពីឆ្នាំ ២០១៩ ។ 

 

ភាពចលាចលក្នុងស្រុកបានវាយប្រហារភាគហ៊ុនថៃ ខណៈដែលវិនិយោគិនបរទេសបានលក់ភាគហ៊ុនចំនួន ១២០ពាន់លានបាត (ប្រហែល ៣,៤ពាន់លានដុល្លារ) ក្នុងឆ្នាំនេះ។

 

យ៉ាងណាមិញ ប្រាក់បាតបានងើបឡើងវិញបន្ទាប់ពីការបោះឆ្នោតក្នុងខែឧសភា ហើយបានកើនឡើងច្រើនជាង ៣ភាគរយនៅក្នុងខែកក្កដា៕