អន្តរជាតិ
ឥណ្ឌូណេស៊ីត្រៀមដី ៥០ម៉ឺនហិកតាសម្រាប់ដំណាំស្រូវ ចំពេលបាតុភូត El Nino
× រដ្ឋាភិបាលឥណ្ឌូណេស៊ីនឹងរៀបចំដីកសិកម្មចំនួន ៥០ម៉ឺនហិកតាសម្រាប់ផលិតស្រូវក្នុង ការប្រមើលមើលពីគ្រោះរាំងស្ងួតដ៏យូរដែលបង្កឡើងដោយបាតុភូតអាកាសធាតុ El Nino ។
តាមសេចក្តីថ្លែងការណ៍របស់លេខាធិការដ្ឋានសារព័ត៌មាន ប្រព័ន្ធផ្សព្វផ្សាយ និង ព័ត៌មាន (BPMI) រដ្ឋមន្ត្រីក្រសួងកសិកម្ម លោក Syahrul Yasin Limpo នៅថ្ងៃទី២ ខែសីហា បានបញ្ជាក់ពីតំបន់មួយចំនួនក្នុងប្រទេសដែលត្រៀមខ្លួនក្នុងការរៀបចំដីកសិកម្ម ដើម្បីធានាស្តុកអង្ករសម្រាប់តម្រូវការក្នុងស្រុក។
«វាមានតំបន់ចំនួនប្រាំមួយ រួមមានតំបន់ស៊ូម៉ាត្រាខាងជើង ស៊ូម៉ាត្រាខាងត្បូង តំបន់ចំនួន បីនៅជ្វា និងស៊ូឡាវ៉េស៊ីខាងត្បូង។ បន្ទាប់មកមានតំបន់ទ្រនាប់ កាលីម៉ាន់តាន់ខាងត្បូង Nusa Tenggara ខាងលិច បាថេន និងឡាំពុង»។ លោក Syahrul លើកឡើងបែបនេះ ដោយបន្តថា លោកប្រាកដ ប្រសិនបើពួកគេសម្រេចបាន ៥០ ម៉ឺនហិកតា ឥណ្ឌូណេស៊ី អាចគ្រប់គ្រងផលប៉ះពាល់នៃបាតុភូត El Nino បានយ៉ាងល្អ។
បន្ថែមពីនេះ តាមទស្សនាវដ្តី Tempo លោក Syahrul បានអះអាងថាមានផែនទីបង្ហាញពី ផលប៉ះពាល់ដ៏អាក្រក់បំផុតលើស្តុកស្រូវនៅឥណ្ឌូណេស៊ីក្នុងកំឡុងពេលបាតុភូត El Nino ចាប់ពីខែសីហា ដល់ខែកញ្ញាឆ្នាំនេះ ទោះបីជាស្ថានភាពតម្លៃ និងស្តុកអង្ករបច្ចុប្បន្នមាននិរន្តរភាពក៏ដោយ។ ឥណ្ឌូណេស៊ីព្យាករណ៍ថា នឹងមានឱនភាពផលិតកម្ម ស្រូវប្រហែល ៣ សែនតោន ទៅ ១២ សែនតោន។
ប្រធានាធិបតីឥណ្ឌូណេស៊ីលោកចូកូ វីដូដូ នៅថ្ងៃដដែលនោះ បានណែនាំមន្ត្រីឱ្យរៀបចំ និង ធានាភាពអាចរកបានអង្ករ បន្ទាប់ពីកិច្ចប្រជុំទាក់ទងនឹងលទ្ធភាពទទួលបានអង្ករ និងតម្លៃ សមរម្យនៅ ឥណ្ឌូណេស៊ី។
មិនខុសពីឥណ្ឌូណេស៊ីឡើយ ប្រទេសផ្សេងទៀតក្នុងតំបន់ កំពុងព្យាយាមទប់ទល់នឹងឥទ្ធិពលគ្រោះ រាំងស្ងួត និងកង្វះទឹកភ្លៀងរបស់ El Nino ដែរ។ នៅម៉ាឡេស៊ីកសិករកំពុងប្រើយុទ្ធសាស្ត្រដូច ជាការដំឡើងបន្ទះប្លាស្ទិកដែលធន់នឹងកាំរស្មីយូវីនៅលើដំណាដើម្បីកាត់បន្ថយផលប៉ះពាល់នៃទិន្នផលដំណាំទាបដោយសារកំដៅកើនឡើង។
នៅហ្វីលីពីន ប្រធានាធិបតី Ferdinand Marcos Jr ដែលជាលេខាធិការកសិកម្មផង ដែរនោះបានរាយការណ៍កាលពីខែមិថុនាថា លោកបានដឹកនាំភ្នាក់ងាររដ្ឋាភិបាលទាំងអស់ឱ្យ អនុវត្តវិធានការអភិរក្សទឹកក្រោមឥទ្ធិពលនៃគ្រោះរាំងស្ងួតដ៏យូរដែលកំពុងតែកើតឡើងដោយសារ El Nino ។
ទន្ទឹមនេះ អង្គការសុខភាពពិភពលោក (WHO) បានប្រកាសថា ខ្លួនកំពុងរៀបចំសម្រាប់ ការកើនឡើងនៃការរីករាលដាលនៃមេរោគដូចជា គ្រុនឈាម Zika និង chikungunya ដែលទាក់ទងនឹង El Nino៕
© រក្សាសិទ្ធិដោយ thmeythmey.com