ហ្វីលីពីន បានចោទឆ្មាំឆ្នេរសមុទ្ររបស់ចិនពីការរារាំងដំណើរ និងការបាញ់ទឹកលើកប៉ាល់ផ្គត់ផ្គង់យោធារបស់ខ្លួននៅសមុទ្រចិនខាងត្បូង។ ទីក្រុងម៉ានីលចាត់ទុករឿងនេះជាសកម្មភាពហួសហេតុ។

 

បើតាមសេចក្តីថ្លែងការណ៍របស់ឆ្មាំសមុទ្រចិន ខ្លួនបានប្រាប់ហ្វីលីពីនកុំឱ្យបញ្ជូនកប៉ាល់ទៅកាន់តំបន់ទីពីរ Thomas Shoal និងសម្ភារៈសំណង់ដែលប្រើសម្រាប់ការជួសជុលទៅកាន់នាវាចម្បាំងនេះឱ្យសោះ នៅពេលដែលបានដឹងពីផែនការផ្គត់ផ្គង់នាពេលថ្មីៗនេះ។ 

 

ចិនក៏បានជំរុញហ្វីលីពីនជុសជុលឡើងវិញនូវនាវានៅតំបន់ទីពីរ Thomas Shoal ដែលខ្លួនអនុញ្ញាតឱ្យដឹកជញ្ជូនតែសម្ភារៈប្រើប្រាស់ប្រចាំថ្ងៃ រួមទាំងអាហារប៉ុណ្ណោះ។​ លើសពីនេះ ខ្លួនបានប្រើប្រាស់កាណុងបាញ់ទឹកដើម្បីជៀសវាងការប៉ះទង្គិចពីការស្ទាក់ចាប់ដោយផ្ទាល់។

 

ចិនកាលពីចុងសប្តាហ៍បាននិយាយថា ខ្លួនមានអធិបតេយ្យភាព មិនអាចប្រកែកបាននៃតំបន់នេះ ហើយបានជំរុញឱ្យហ្វីលីពីនបញ្ឈប់សកម្មភាពរំលោភបំពាននៅក្នុងដែនទឹកនេះ។

 

ភ្លាមៗនេះ ប្រធានាធិបតីហ្វីលីពីនលោក Ferdinand Marcos Jr បានលើកឡើងថា ហ្វីលីពីននៅតែបន្តអះអាងអធិបតេយ្យភាព និងសិទ្ធិដែនដីរបស់ខ្លួន ទោះបីជាមានបញ្ហាប្រឈមនៅក្នុងសមុទ្រចិនខាងត្បូងក៏ដោយ។ ហ្វីលីពីន ក៏បានកោះហៅអគ្គរដ្ឋចិនប្រចាំទីក្រុងម៉ានីលដើម្បីបង្ហាញការមិនពេញចិត្តផងដែរ។

 

លោក Marcos បាន​សង្កត់ធ្ងន់ថា ៖ « ​ហ្វីលីពីននៅតែ​​បន្ត​ការ​តវ៉ា​របស់​ខ្លួន ​ប្រឆាំង​នឹង​​ចិន» ។

 

ចិនទាមទារអធិបតេយ្យភាពលើស្ទើរតែទាំងអស់នៃសមុទ្រចិនខាងត្បូងដែលជាផ្លូវដឹកជញ្ជូនសំខាន់ៗ។ ក្រៅពីប្រទេសទាំងពីរ ដែនទឹកទាំងនោះក៏ត្រូវបានទាមទារដោយវៀតណាម តៃវ៉ាន់ ព្រុយណេ និងម៉ាឡេស៊ីផងដែរ៕