អន្តរជាតិ
នយោបាយអន្តរជាតិ
បក្សភឿថៃចាប់ដៃបក្សភូមិចៃថៃ បង្កើតសម្ព័ន្ធភាពថ្មី មេដឹកនាំបក្សភឿថៃ (ស្តាំ) និងបក្ស Bhumjaithai (ឆ្វេង) ។ រូបភាព ៖ AP ។
× នៅថ្ងៃទី៨ ខែសីហា គណបក្សភឿថៃ និង Bhumjaithai ដែលមានមានអាសនៈសរុបចំនួន ២១២ បានប្រកាសសម្ព័ន្ធថ្មីមួយ ដើម្បីឈានទៅបង្កើតរដ្ឋាភិបាលចម្រុះ។ បក្សទាំង២ អះអាងថា នឹងមានការគាំទ្រច្រើនពីសភាតំណាងរាស្ត្រ។
បក្សភឿថៃដែលជាប់ចំណាត់ថ្នាក់ទីពីរនៅក្នុងការបោះឆ្នោតសកលកាលពីថ្ងៃទី១៤ ខែឧសភា ជាមួយអាសនៈចំនួន១៤១ និងបក្សភូមិចៃថៃ ដែលមានអាសនៈ៧១ បានប្រកាសពីការចងសម្ព័ន្ធថ្មីមួយដែលធ្វើឱ្យចំនួនអសនៈកើនដល់២១២។
សំឡេង២១២នេះ នឹងក្លាយជាមូលដ្ឋានសម្រាប់បង្កើតរដ្ឋាភិបាល ដើម្បីទទួលបានការគាំទ្រភាគច្រើននៅក្នុងសភា ដូច្នេះ មិនមានការបារម្ភពីលទ្ធភាពនៃរដ្ឋាភិបាលដែលមានសំឡេងភាគតិចនេះទេ។ នេះជាការអះអាងរបស់លោក Cholnan Srikaew មេដឹកនាំបក្សភឿថៃក្នុងសន្និសីទសារព័ត៌មានថ្ងៃទី៧ ខែសីហា។
លោក Cholnan Srikaew បានប្រកាសពីគោលបំណងសំខាន់ៗនៃរដ្ឋាភិបាលដែលបានស្នើឡើង ហើយក៏បានលើកពីលទ្ធភាពនៃការកែរដ្ឋធម្មនុញ្ញ។ លោកថ្លែងថា នឹងមានការបោះឆ្នោតប្រជាមតិជុំវិញការសរសេររដ្ឋធម្មនុញ្ញថ្មី។
លើសពីនេះ បក្សភឿថៃនៅតែប្រកាន់ខ្ជាប់ថា មិនមានវត្តមានបក្សឆ្ពោះទៅមុខទេនៅក្នុងសម្ព័ន្ធថ្មីនេះ។ លោក Cholnan Srikaew បញ្ជាក់ថា សមាជិកសភាព្រឹទ្ធសភា និងបក្សដទៃទៀតនឹងមិនគាំទ្ររដ្ឋាភិបាលចម្រុះនេះទេ ប្រសិនបើបក្សឆ្ពោះទៅមុខចូលរួម។
មេដឹកនាំបក្សភឿថៃរូបនេះ មិនបានបង្ហាញពីឈ្មោះគណបក្សដទៃទៀតទេដែលត្រូវមកចូលរួមសម្ព័ន្ធជាមួយនោះ ប៉ុន្តែអនុប្រធានបក្សលោក Phumtham Wechayachai បាននិយាយថា អ្នកទាំងអស់គ្នានឹងឃើញថាគណបក្សណាខ្លះនឹងគាំទ្រជាមួយភឿថៃនៅចុងសប្តាហ៍នេះ។
ចំណែកលោក Anutin Charnvirakul មេដឹកនាំបក្សភូមិចៃថៃបានអះអាងស្រដៀងគ្នាថា ការបង្កើតសម្ព័ន្ធថ្មីនេះអាចធ្វើរួច ហើយគណបក្សចម្រុះប្រាកដជាមានគាំទ្រពីសភាជាងពាក់កណ្តាល៕
© រក្សាសិទ្ធិដោយ thmeythmey.com